Nongpoh, Lber 29: Ki khun ki hajar jong ka Raid Nongpoh sa shisien pat mynta u snem ki la kiew biang sha u Lum Wortoh ban sakhi ïa ka tamasa Shad Sajer kaba la ju pynlong shisien shisnem da ka Dorbar Raid Nongpoh da ka jingangnud ban pynim bad pynneh pynsah ïa ka riti ka dustur, ka kolshor tynrai bala buh naduh u mynbarim bad lyngba katei ka tamasa lah ruh ban sakhi ïa ka jingriewspah ki riam tynrai, ki shad tynrai bad kumjuh ruh wat ki jingdih bad jingbam tynrai.
Ha katei ka tamasa la wan ruh ban pynshit pynshngaiñ da u Bah Prestone Tynsong Symbud Myntri Rangbah ka jylla kum u kongsan, ha ka jingdonlang u Bah Mayral Born Syiem MLA ka Nongpoh, ka kong Rona Khymdeit MDC ka Nongpoh, u Abhilash Baranwal Deputy Commissioner ka Ri-Bhoi District, u Bah Linus Lyngdoh, Lyngdoh Raid, ki longsan mansan ka Raid Nongpoh, ki nongïalam shnong lem bad ki paidbah.
Haba kren maitphang ha katei ka sngi, u Bah Linus Lyngdoh, kum u Lyngdoh Raid u la ong ba ka Shad sajer kadei kawei na ka jinglehñiam jong u mynbarim, kum ka jingainguh ïa u blei ba u la kyrkhu ïa ka rep ka riang, ki soh ki pai, ki jingthung jingtep. Hadien ba bun na ka khun ki hajar ki la kylla khristan, ka jinglehñiam kam don shuh hynrei ngi don ïa ka shad sajer tang ban pynim ïa ka riti ka dustur, ka kolshor, ka riam tynrai, bad khamtam ba ngi na ka pateng ban wan ngin nym klet ïa ka tynrai jong ka Raid Nongpoh.
U la ong ruh ba ha ki snem bala leit noh ka Shad sajer la ju pynlong ha Nongpoh bad la ïoh ka kyrteng jong kawei ka dong kum ka dong Sajer, hynrei ar snem mynta bad kane ka dei ka sien ba ar bala pynlong ïa katei ka tamasa ha lum Wortoh namar ha utei u lum ka don ka khana ba ki kmie tymmen ki kpa tymmen ki wan shong wan sah ha u tei u lum, bad namar ka jingjynjar um shiteng ki sah shatei sha poh bad kine kiba sah halor utei u lum Wortoh ki ong hei ki Nongpoh ba mih sa ka kyrteng Nongpoh.
Kum ka Dorbar Raid hi “ngi kwah ban pynlong ïa u Lum Wortoh kum ka heritage site, ka jaka jngoh kai pyrthei bad ruh ban pynneh pynsah ïa ka mariang, bad kane kan sa long kum kawei ka jaka ba pyngngad bad itynnad ban khring ïa ki briew na kylleng namar ha utei u lum lah ruh ban ïohi kyndiang ïa ka sor Nongpoh” la ong u Bah Linus ryngkat ka jingkyrpad ruh na u Myntri ba dei peit ïa ka tnad PWD u Bah Prestone Tynsong ban pynïoh surok namar ka jingjynjar bad syrton ban poi sha utei u lum.
Haba kren ha katei ka sngi na ka liang u Bah Prestone Tynsong u la ong ba ka jingangnud jong ka sorkar haduh kine ki sngi ba mynta ka long kumno ban kyntiew ban pynkhlaiñ ban pynneh pynsah ïa ka riti ka dustur, ka niam ka rukom jong u mynbarim, na kata ka daw ha ki jaka ba kum kine bad kiba i donkam, na ka liang ka sorkar ka thmu ban pynbit ban pynbiang khnang ba ki khun ki hajar hapoh ka Raid, ka Hima ki lah ban pynneh pynsah.
U la ai ruh ka jingkhublei ba kyrpang ïa u Lyngdoh bad ka Dorbar jong ka Raid Nongpoh kaba la pynlong ïa katei ka tamasa kaba phuh ba phieng namar kane ka dei ka sien kaba ar bala pynlong ïa katei ka tamasa Shad Sajer ha u Lum Wortoh bad kyrmen ruh ba ha ki snem ban wan kane ka tamasa kan dang heh bad khring wat ïa ki nongjngohkai pyrthei na kylleng ki jaka bad ka ri.
Na ka liang u Bah Prestone u la ai jingmut ruh ïa ka Raid Nongpoh ban thaw da ka kynja Society na ka bynta ki lad jingïarap namar ka sorkar ka don shibun ki skhim ban ïarap kyrpang khamtam ha kum kitei ki jaka kiba don jingmut.
