Shillong, Lber, 29: Ki nongseng skul kiba don hapoh ka shatri jong ka Meghalaya School welfare Development Association (MSWDA) Central Body ki la rai ban sa phah shen da ka jingthoh sha ka Sorkar Jylla ba kan ai jingithuh ïa ki skul ba la seng da ki misioneri bad ki kynhun shimet kum ki Non-Government Institution.
“Ha ka taiew ban sa wan ngin sa ai da ka jingthoh sha ka Sorkar Jylla halor kane ka jingai jingmut,” la ong u President jong ka Association u Bah HM Marbaniang ha ka jingïakren bad ki lad pathai khubor hadien ba la wai ka jingïalang kaba la long ha Khasi National Dorbar Hall Mawkhar ha ka sngi Saitjaiñ.
“Ngi la ïakren ïa ka jingpynryntih ïa ki skul baroh naduh Pre-Primary haduh Higher Secondary hadien ba ngi la ïohi ïa ka jingthmu ban pynbeit ryntih ïa ki skul katkum ka polisi ïa kaba la sdang ban leh sorjamin lyngba ki CRC,” la pyntip u Bah Marbaniang.
“Katba dang ïaid ka jingsorjamin ngi kwah ban ai jingmut ïa ka sorkar ban ithuh noh ïa ki skul ba la seng da ki mishon, ki NGO kum ki Non Government Institution. Ngi sngewdei ruh ban tyrwa ïa ka Sorkar ba kan ai jingrarap ïa ki nonghikai jong ngi kaba ïaryngkat ha ki skul Non Government Institution khnang ba kan long kaba ryntih bad ban khanglad ïa ka jingiehnoh shiteng por jong ki nonghikai ïa ka kam,” ula ong bad bynrap, “ngi kwah ba ka sorkar kan ïarap ban siew tulop da ka Scale, kata, tang ka Basic bad ka DA khnang ba ki nonghikai kim donkam shuh ban mih sha surok ban dawa.”
“Ngi kwah ruh ïa ka Sorkar ban pyntreikam ïa ka polisi ba la mynjur bad ym dei ban shu shna khlem da pyntreikam,” u la ong.
U Bah Marbaniang, u la ong ruh ba ka MSWDA ka kwah ban ai jingmut ïa ka Sorkar ba kan ïohi ïa ki jingeh jong ka pule ka puthi naduh ki nongkyndong katkum ka jingdon jong ki nonghikai bad ki khynnah hapoh ki skul. “Ngi kwah ba ka Sorkar kan thung nonghikai uwei shi klas naduh Pre-Primary khnang ban pynbha ïa ka pule puthi namarba tangda ka bor jong ka Managing Commitee kam lah,” u la bynrap.
U la kynthoh ruh ba ki don ki skul kiba ki khynnah ki pas ïa ka eksamin Matrik 80-90 percent manla u snem kim ïoh jingïarap katba ki don pat ki skul ki bym don satia ki khynnah kiba pas ïa ka eksamin Matrik ki ïoh jingïarap.
Halor ka bor pynïaid skul, katkum ba la pruiddak ha ka Meghalaya State Education Policy, 2018 u Bah Marbaniang ula ong, “wat ki jingïarap ne ka School Grant kaba T.10 hajar ne 25 hajar tang shisien shi snem ïa kata ruh kim ai shuh sha ka SMC hynrei la ai sha ki Vendor ne Supplier. Kane ka jingïarap kam lah ban bei ïa ki jinglut namarba la hap ban bei ïa ki jinglut na ka skul.”
Shuh shuh u la ong ba ka seng ka kyrpad ïa ka Sorkar ban ai jingïarap ïa ki Secondary Section namarba lada ym ïarap da ka Sorkar kan shem jingeh ïa ki bor pynïaid skul wat ban siew tulop ïa ki nonghikai.
Halor ka jingai jinghikai pyntbit ïa ki nonghikai kiba la don lypa ha ka kam, u Bah Marbaniang u la ong, “ngi kwah ba ka Sorkar kan plie lad ïa ki ban pyndep ïa ka B.Ed namarba bun ki dei kiba la pyndep ïa ka D.El.Ed. Wat ïa ki nonghikai ki bym pat pyndep ïa ka D.El.Ed ngi kwah ba ka Sorkar kan plie lad na ka bynta jong ki.”
