Nongpoh, Rymphang 13: Palat 40 ngut ki paidbah naduh ki shynrang bad kynthei kumjuh ruh ki khyllung naka shnong Nongkhrah ha Ri Bhoi kila poi Hospital naduh ka sngi Saitjaiñ hadien ba kila ïoh kem pang kynsan bad ïoh ruh ïaka pang prie pynhiar bala suba ba dei naka jingbam ïaka dohsñiang ba ki leit bam ha kawei ka ïing khawai ha katei ka shnong.
Katkum ka khubor bala ïoh lum la ïathuh ba kala don ka jing ïa bam khawai ha kawei ka ïing ha katei ka shnong haka miet sngi thohdieng jong ka 10 tarik, hynrei kaba sngew lyngngoh ba kitei ki paidbah kiba leit bam kila ïoh kem pang kynsan haka step jong ka Sngi Saitjaiñ bad la pynkit noh mar mar sha ki jaka sumar ba kynthup ha Bethany Hospital bad ha Civil Hospital naduh ki kynthei shynrang bad kumjuh ruh ki khyllung.
Katto katne ki paidbah kiba leit bam ha katei ka ïing khawai kila suba ruh ba dei naka dohsniang ba ki bam kaba lah ban dei kaba la sniew namar kiba ïoh pang ki dei tang kiba bam ïaka doh sniang katba kiwei ki lait.
Naka liang ki doctor hadien ka jingtohkit kila suba jur ba ka dei naka bam bala sniew (Food Poisoning) katkum ka jingïathuh jong ki paidbah bad naka liang ka tnad ka koit ka khiah jong ka Ri Bhoi ki dang leit sha katei ka jaka ban pynlong ka jingwad bñiah ban lap ïaka daw tynrai bad kumjuh ruh ban shim ïaki nuksa naki paidbah ban phah leh ïaki test shabar jylla.
Kumba la ïoh jingtip naki doctor kila ïathuh ba kitei kiba kem pang bun napdeng jong ki kila ïoh ïaka jingsumar kaba kloi bad don ruh kiba la sdang ban koit, bad kyrpad ruh ïa kito ki paidbah kiba la leit ban bam ha katei ka ïing bad kiba la sngew kem pang ki dei ban leit mar mar sha ki jaka sumar ban ïoh ïaka jingsumar kaba kloi.
