Tynsong: Ha ka 2 tarik janmiet phin sa phone ïa u Conrad bad Prestone ban wan pan lyngknot

0

Shillong, Rymphang 13 : U National Vice President ka NPP ba dei ruh u Symbud Myntri Rangbah ka jylla, Bah Prestone Tynsong ha ka sngi Nyngkong u la ong ba watla mynta baroh ki party ki ïa beiñ ïa khoh ïa ka NPP hynrei ha kaba khatduh hadien ka 2tarik u Lber, kin sa wan ban pan lyngknot lang na ka NPP ban donlang ha ka sorkar.
“Ki paralok na UDP ym dei ba ngi ïa thew, ngi la treilang san snem bad phi hynrei phi thad ïangi mynta arbnai shwa ka elekshon. Kynmaw bha ha ka 02tarik janmiet phin sa phone ïa u Conrad ïa u Bah Prestone phin sa ong to seh ai lem i lyngknot iba rit ba ria,” la ong u Bah Prestone ha ka jingïalang ïalap elekshon kaba long ha Rangshken na ka bynta u kyrtong ka NPP na Sohïong Bah Samlin Malngiang.
Utei u nongïalam ka NPP u la ong ruh ba lada don kiba wan tyrwa pisa ki paidbah ki dei ban shim beit hynrei kim dei ban ai vote hynrei ban pynjop biang ïa u Bah Samlin. “Por ba dang jngai ka elekshon phi leh bym ithuh por elekshon pat phi wan khroh phi bat bad kti bad kjat hynrei u paidbah ka Sohiong u la sngewthuh bha mynta,” la bynrap biang u Bah Prestone.
Shwa kane, u la ong ruh baroh ki party kiba donlang bad ka NPP ha ka sorkar ha ki san snem ha ka eh ka shitom ki ju ong, “Kat u Conrad u Prestone ym ïoh shuh hynrei mynta pat ki dro dur bula ïangi tang ban shu pynbiej ïa u paidbah. Hynrei ka jingshisha kan sa paw ha ka 02tarik namar ngi aiti met bad mynsiem na ka bynta ka jylla.”
Nalorkata, u ong ruh ba baroh ki nongïalap elekshon jong u Bah HDR Lyngdoh ki la shu kynthoh beit kumba lynthem da ki maw ïa ka NPP. “Tangba hadien ka 2tarik bad 3tarik shajrong ngin thaw sorkar bad u Bah Samlin un don biang ha Secretariat bad un don ha syndah u Prestone ha syndah u Conrad Sangma. Bad lada phi kwah to pyntam noh mynta ka kynti 6000 – 7000 vote,” u la ong da kaba kyntu ïa ki paidbah nongkyrshan ka UDP ban kylla noh katba ka por ka dang don.
U la ïathuh ruh ba dang shu wanphai ha kine ki khyndiat sngi na rilum Garo bad don ka jingkyrmen ba ka party kan ïoh kumba 14 ngut ei ei ki MLA na katei ka thaiñ katba na ka rilum Khasi – Jaiñtia pat kin ïoh kumba 22 ngut ei ei kaba mut baroh 36 ngut. “Kumta ngin ym donkam shuh ïano ïano ruh ban thaw ïa ka sorkar hadien ka 02tarik,” u la ong.

Leave A Reply

Your email address will not be published.