Shillong, Rymphang 14: Ka Seng Congress mynta ka sngi ka la khyrwit (Chargesheet) da ki 10 tylli ki kam bamsap kiba la leh da ka sorkar MDA.
Kine ki 10 tylli ki kam bamsap ba la kynnoh da ka Seng Congress lyngba u Chairman ka AICC Media and Publicity Chairman, u Pawan Khera, ka kynthup ïa ka jingbamsap halor ka jingkhyllem u tnum pyllun (dome) ha ka ïingdorbar Thawaiñ ba dang shna ha New Shillong, ka bamsap Covid, ka bamsap MUDA, ka jyrsieh khaïi dewïong tuh, , ka jyrsieh Saubhagya scheme, ka bamsap die tuh ïa u khaw, ka bamsap ai jingbit dukan kyiad die lang, ka jyrsieh khalai Casino, ka jysrieh kam kontrak bad ka sorkar bad ka jyrsieh thied kali ha ka tnad Pulit.
“Ka tnum pyllun jong ka ïingdorbar ba dang shna, ka la khyllem kynsan kynsan jraiñ shiteng miet na ka daw ka jingtrei tortibad ka jingaiwai ban trei sha kawei ka kompeni bym ler na Uttar Pradesh”, la ong u Khera haba ïakren bad ki nongthoh khubor ha Shillong.
Une u heh ka All India Congress Committee, u la ong ba kaei kaba la nang kham pynsniew dur shuh shuh ïa kame ka jyrsieh ka long ba ka ai ticket ban ïakhun na ka NPP ïa u Executive Engineer ka PWD(B) uba dei u briew uba dei peit dei khmih ïa ka jingtei ïa kane ka ïingdorbar. “Lada ym dei ka kam buhrieh ïa ki kam bamsap, kan dei ka ei pat ban ai ticket ïa une u Emgineer na ka NPP”, u la ong.
Halor ka jyrsieh ïakhun jing pang COVID, u heh ka AICC, u la ong ba ka Meghalaya ka la pyllut tam 8 shah na kaba pyllut ka Manipur, wat lada ka jingïap bad ka jingdon ki nongpang COVID ka kham duna ban ïa ka Manipur. “Ka Meghalaya kala pyllut 816 Klur na ka bynta ki 96,785 ngut kiba pang COVID bad ai jingïarap na ka bynta ki 1624 kiba ïap. Katba ka Manipur pat ka pyllut tang hapoh 100 klur na ka bynta 1.4 lak ngut kiba pang bad 2149 ngut kiba ïap.
Shuh shuh u Khera u la kynnoh ba ak don ka jyrsieh ha MUDA ruh, namar ba la mang pisa 500 klur tyngka hynrei haduh mynta ym shym la ai Utilisation Certificate kumno la pyllut ïa kane ka pisa bad ym tip shano ruh ka don. U la ong ruh ba ka jingthmu ban tei ïa ka Shopping Complex ha jaka jong ka Meghalaya Transport Corporation (MTC) kadei kaba hap hap ban ïa peitngor, namar ka sorkar ka thmu ban pyllut haduh 200 klur tyngka ha kane ka jaka kaba ka jingheh jong ka long duna ïa ka 50,000 sq ft.
U nongïalam ka Congress u la ong ruh ba ka CAG Report ha u snem 2021, ka la kdew ba ka don ka jingpyndonkam bakla kaba haduh 149 klur tyngka ha kaba ïadei bad ka jingpyntreikam ïa ka Saubhagya Scheme ne ka skhim ai bording elektrik ïa kiba duk sha nongkyndong. U la kdew ruh halor ka jingïoh kem kumba 1 lak byrni u khaw reshon na Boko, Assam,uba dei u khaw ban sam sha ki paidbah bad ka sorkar kala ïada tyngeh ïa une u khaw uba ka Congress ka la kynnoh ba kadei ka jingdie tuh ïa u khaw paidbah.
Ka Congress ka la khyrwit tyngeh ïa ki Kompeni jong ki Dhar ne ka Dhar Construction Company (DCC, da kaba kynnoh ba la jan baroh ki jingtrei kontrak jong ka sorkar la ai lut sha kane ka Kompeni namar ba ki don arngut ki Minister kiba dei ki nongpynïaid jong kane ka Kompeni. Ka Party ka la ther tyngeh ruh halor ka jyrsieh kaba shyrkhei tam jong ka sorkar MDA bad kata ka jingkhaïi tuh ïa u dewïong ,ha kaba ka khajna kaba dei ban ïoh ka sorkar ka la poi pynban sha ki riewshimet kiba pynïaid ïa ka sorkar da ki spah bad hajar klur tyngka.
