Ym tang kiba shong ha kane ka ri, wat sha Bangladesh ruh kin shngaiñ lada ngi wan ha ka bor: Ardent

0

Pynursla, Rymphang 13: U President jong ka Voice of the People Party (VPP) u Bah Ardent M Basa iawmoit u la ong ba lada ki paidbah ki pynjop ïa ki kyrtong kiba ka party ka pynïakhun bad lada ka don ha ka bor ym tang ba ki Khasi kiba shong ha ka jylla hynrei kiba sha bar jylla bad bar ri ruh kin shngaiñ namar kum ka sorkar kin leit jngoh ban ai mynsiem ban pyni ruh ba ka jaidbynriew nagnge ka kynmaw ïa ki.
Haba kren ha ka jingïalang pynshai paidbah ïa ki nongrim ka party ha ka shnong Lyngkyrdem kaba hap ha Pynursla Constituency u Bah Ardent u la ong ba lada kiwei pat ki sorkar jylla kiba don ha kane ka thaiñ Lam Mih ‘Ngi ki nud ban pyni bor haba don kiba ktah kti bad pynshong syier ïa ki doh ki snam jong ki ka daw ka dei beit namar ki la sei da ki nongïalam kiba kynsai ym ki khawpud.
“Lada u Mizo u nud, u Naga u nud ban pyni bor haba don ka jingshah pynshong syier ki doh ki sam jong ki balei ngi ngim nud namar ka daw ka dei ba ngim pat sei ïa kita ki nongïalam kiba shlur ban leh kumta. Lada u paidbah u pynkhamti ïa ngi ïa ka bor lada donkam ban pyni bor bad ka sorkar India ngi nud ban leh kumta haba dawa ka kam bad nga kwah ruh ban ong ba ym tang ki doh ki snam jong ngi kiba shong ha kine ki lum Khasi bad ha ri India kin sngaiñ hynrei wat kiba shong sha Bangladesh ruh namar kum ka sorkar ngin leit jngoh ïa ki ban ngin ai mynsiem ba kum ka jaidbynriew nangne ngin pyni ba ngi long kawei lang bad ki,” u la ong.
U la ong ruh ba ha ka khana pateng ka jylla ym pat ju don uwei ruh u Myntri sorkar ne ka sorkar kaba la nud ban ong ba ki jaka ha Block I bad Block II kim dei shuh ki jong ngi hynrei dei tang kane ka sorkar kaba mynta kaba don kiba kum kita.
“Ym pat ju jia koit ban don ka sorkar ne ki myntri sorkar ban ong ba ka Block I bad Block II kim dei shuh ki jong ka jylla Meghalaya lait noh u Symbud Myntri Rangbah ba mynta uba dei ruh u MLA jong phi uba la ong kumtei. Hato phi ïohi ba ki long kmie ki ïam kthang ban ïohsngew ïa katei ka kyntien na u MLA jong phi hato phim don jingsngew synei mo ïa ki ban shah kyntiat sha ka jylla Assam bad lada phi don ka jinsgnew synei ïa la ki para ri ai ka jubab jong phi lyngba ka shi vote da kaba pynjop ïa u Bah Manbhalang Thabah na Pynursla bad ïa baroh ki kyrtong kiba kum ka party ngi pynïakhun,” u la ong.
U la ong ruh ba kumba la seng nongrim ïa ka VPP ban pynbha pat ban ban pynim pat ïa ka burom ba la duh ban ban pynkylla dur sha kaba kham bha yn lah ban pynurlong tang lada ki paidbah ki pynjop bun ngut ki kyrtong na ka VPP.
“Sangeh noh ka jingpyrkhat tang ïa ka ma lade ba tang ba la biang ka Pynursla la biang beit lada ha ka jylla ki leh niew katto katno ruh hynrei kynmaw lada ka jylla ka ngam ka Pynursla ruh kan ngam lang bad na kata ka daw ka VPP kam ïakhun tang ban jop na Pynursla hynrei ban jop lang i para doh para snam na kylleng ka jaka,” la bynrap u bah Ardent.
Haba kren ha kane ka sngi na ka liang u Kyrtong ka VPP u bah Manbhalang u la ong ba kumba ka party ka don ka thong ban wanrah jingkylla na bynta ka lawei ki pateng yn lah ban kynjoh shata tang da ka jinsgnoh kti lang da baroh ban pynjop ïa u Prah ym tang na Pynursla hynrei na baroh ki constituency ba u Prah u ïakhun.
“Ngi (kyrtong) long kum ki rishot ha ka ïing paki bad ki paidbah ki dei ki tnum bad lada phi pynjop tang ïa u Bah Ardent tang marwei un ym lah ban kit ïa ka tnum donkam lang shibun ki rishot ka VPP ba kin jop ba kin ïoh tynrong lang,” u la ong.

Leave A Reply

Your email address will not be published.