Shillong, Rymphang 13 : U kyrtong ka KAM na North Shillong constituency bah Kyrsoi Pyrthuh hynne ka sngi ula pyllait paidbah ïaka Manifesto lane ïaki mat treikam lada u shah jied ha kane ka elekshon ban wan.
Haba kren ha kane ka sngi u bah Kyrsoi ula ïathuh ba ïa kane ka mat (Manifesto) la thaw katkum ka jingai jingmut na ki paidbah ka North Shillong constituency ba kynthup naduh ki paidbah ba shong dukan, ki samla pule, ki stad ha ki liang bapher bapher.
“Kane ka Manifesto kam dei jong u bah Kyrsoi hynrei kadei jong ki paidbah, bala thoh hi da ki paidbah ka North Shillong naka bynta ki paidbah ka constituency bad ïa kine ki mat yn pyntreikam hapoh 90 sngi lada nga u shah jied kum u MLA” la ong u bah Kyrsoi.
U bah Kyrsoi ula ong ba lada u shah jied kum u MLA ka North Shillong, un pynkylla ïaka ophis MLA kum ka ophis paidbah ka ban hap hapoh ka RTI Act khnang ba ki paidbah kin tip kumno la pyntreikam ïaki MLA skhim hapoh kla constituency.
Ula ong ba lada u shah jied kum u MLA um treh ban shim tulop kumba ïoh ki kumba shim kiwei ki MLA hynrei un shim ka jingsiew kumba ïoh ki nongbylla sngi tad haduh ba ka sorkar ka ithuh ïaka jingsiew ki nongbylla sngi.
Shuh shuh ula bynrap ba ka KAM Meghalaya lada ka shah jied kum ki MLA kan ïaleh katba lah ban wanrah ki Polisi naka bynta ban pynbha ïaka ïoh kam ïoh jam, ban kyntiew ïaka koit ka khiah, ban tei ki jingtei kam pynroi bad kan ïaleh ruh ban pynlong aiñ iaka Meghalaya Fairness in Government Contract Bill, Meghalaya Rights to Grievance Redress Accountability and Transparency Act, Public Health Act, ka Meghalaya Social Security Act bad kiwei kiwei de.
U bah Kyrsoi ula kular ruh ban pynbiang um bam um dih naka bynta ki paidbah ka North Shillong bad un ïaleh ruh ban kyntiew ïaka jingpyntreikam ïaka buit ‘Community Rain Water Harvesting’.
Nalor kane u bah Kyrsoi u pyntip ruh ba u don jingthmu ban thaw daka jaka hikai skul lane ka Community Learning Centre naka bynta ki khynnah skul klas I-VIII, klas VIII-XII bad ban tei ïaka Skill Training and Community Rehabilitation Centre.
