Shillong, Rymphang 13 : Kawei ka samla lud kaba dang 19 snem ka rta ka ujor da ka ejahar pyrshah ïa u trai pynïaid ïalehkai kilan met ne ka Gym ïa uba la tip kyrteng u Raju Baruah halor ka jingkynnoh ba ula jrong kti ïaka.
Haka ejahar kane ka samla kala ïathuh ba kane ka la jia ha ka 10 tarik mynta u bnai haka por 4:15 janmiet haka ba u Raju Baruah ula pynbor ïa kane ka samla ban tah umphniang ïa kamet namar ka lah bun tang da ka khleiñ.
Kane ka samla kala ïathuh ka la kyntait ban tah umphniang da u Raju ne hynrei u la pynthiah jubor ban kyllan umphñiang ïa ka met, bad tan ïa ka patlun bad jrongkti ïaka bad hadien ka jingïaksaid ka la lait bad ka la phet noh sha surok bad kala phone ïa ka kmie kaba la wan mar mar ban ïarap ïaka.
Kala kam ruh ba une u Raju Baruah u la ju mlien ban leh ïa kine ki kam ïa kiwei pat ki kynthei hynrei kiba bun ki tieng ban pynpaw pyrthei.
Na ka liang jong kane ka samla ha ryngkat ki ba ha ïing hasem baroh ki kwah ba ïa une u briew kim dei shuh ban pyllait na phatok hynrei dei ban set beit ïa u shi jingim.
Halor kane ka jingjia mynta hi ka sngi ka Khasi Students Union (KSU) Shillong Mihngi Circle ka la leit ban khang tala shisyndon ïa ka jaka kilan met bala tip kyrteng ka ‘Muscle Blaster Gym’ kaba don ha Thana Road hadien ba uwei u trai jong kane u Raju Baruah, u la shah kynnoh jrong kti ïa kawei ka thei samla kaba 19 snem.
Haba kren sha ki lad pathai khubor u Vice president ka KSU Shillong Mihngi Circle u Alquiz Kharbani ula pynrem jur ïa kane ka jingjia bad dawa naki bor jong ka aiñ ba dei ban pynshitom tyngeh kat kum ki kyndon aiñ pyrshah ïa une u trai kane ka Gym
Ula ong ba ki trai jong ka jaka kilan met kidei ban shim ïa ki lad ki lynti na ka bynta ban ai ka jingïada ba kyrpang na bynta ki kynthei.
