Pynwai ka ïing bishar ïa ka mukotduma EPF u Bah Teibor

0

Shillong, Rymphang 13 : Ka ïingbishar High Court jong ka Meghalaya ka la pynwai noh ïa ka mukotduma pyrshah ïa u kyrtong ka NPP na Mawlai, u Bah Teiborlang Pathaw, bad hadien ba la ïoh ïa ka rai na ka Ïingbishar na ka liang u Bah Teibor u la leit ban pyntip ruh sha ka returning officer hynne ka lah Sngi u Blei.
Kane ka jingleit u Bah Teibor ban pyntip sha ki bor pynïaid election halor ka jingbym don mukotduma shuh ka long hadien ba ki kyndon jong ka election commission of India ki la bthah ïa ki seng saiñpyrthei ban pynbna paidbah ïa ki kyrtong kiba don mukotduma ne kino kino ki kam sniew, bad lyngba ka jingpyntip noh sha ki bor pynïaid election ka mut ba u kyrtong ka NPP na Mawlai u la khuid na baroh ki jingshah kynnoh na ka mukotduma hashwa jong ka election.
“Nga wan ban pyntip sha ka returning officer (RO) mynta ba ngam don mukotduma shuh kumba la pynbna hashwa, hadien ba ka ïingbishar ba don burom ka la pyllait ïa nga na kane ka mukotduma,” u la ong.
Katkum ka jingïathuh u Bah Teibor Pathaw kane kadei ka mukotduma halor ka Employee Provident Fund (EPF) jong ki nongtrei ha ka por ba u dang pynïaid ïa kawei ka agency.
“Kane ka mukotduma kadei naduh u snem 2017, ha kaba la kynnoh ba ka don ka jingbakla ha ka rukom siew ïa ka EPF jong ki nongtrei, kadei ka jingïapynbeit bad ka ophis ba peit ïa ka EPF bad na ka liang jong ngi ngi la dep siew ïa kaba dei ban siew kumba la bthah naduh u snem 2018,” la ïathuh u Bah Teibor bad bynrap ba ka jingslem pat ban bishar ïa kane ka mukotduma kadei namar ka jingwan noh jong ka khlam COVID-19 ïa kaba ka ïingbishar ka la pyndep ïa ka rai ha ka 10 tarik mynta u bnai.
“Namar ba ka High Court ba don burom ka la pynkut ïa kane ka mukotduma namar ba ngam don eiei, nga kyrpad ïa ki paralok ba ïakhun pyrshah ba kin sngewthuh ïa kane, bad katkum ka kyndon model code of conduct lada kynthah ne kynthoh khlem tip ka lah ban leit kylla ka jingujor pyrshah ïa kiba kynthoh,” la ong u Bah Teibor bad bynrap shuh shuh ba lada ki dang bteng ban kynthoh hadien kane ka rai jong ka Ïingbishar un sa leh ïa kaba dei ban leh.

Leave A Reply

Your email address will not be published.