Poi 6 ngut ban aireng ha Shillong seat bad 4 ngut ha Tura seat

Shillong, Lber 27 : Ki la don baroh hynriew ngut ki kyrtong kiba thep kyrteng na Shillong Parliamentary seat bad saw ngut na Tura seat na bynta ka elekshon MP kaban long ha ka 19tarik Ïaiong mynta u snem hadien ba ka jingthep kyrteng ka la kut noh ha kane ka sngi Balang, ka 27tarik Lber.
Haba phai sha ka Shillong seat ym shym la don shuh kiba thep kyrteng ha kane ka sngi khatduh katba na Tura pat dei u MLA barim ka TMC u Zenith Sangma uba la pyndep ïa ka jingthep kyrteng ha kane ka sngi ba khatduh.
Kumba ka long hi, na Shillong kiba mih ban thep kyrteng ki kynthup ïa u MP ba mynta ba dei ruh u kyrtong ka Congress Bah Vincent H Pala, nangta kyrtong ka NPP ba dei ruh ka Myntri Sorkar Kong Ampareen Lyngdoh, kyrtong ka RDA Bah Robertjune Kharjahrin bad u kyrtong ka VPP Dr. Ricky J Syngkon.
Nalor kine la don ruh arngut ki kyrtong shimet kata u Bah Peter Shallam bad u Prof Lakhon Kma.
Ha Tura pat kiba thep kyrteng ki kynthup ïa ka MP ba mynta bad kyrtong ka NPP ka Agatha Sangma, nangta u kyrtong ka Congress u Saleng A Sangma, kyrtong ka TMC u Zenith Sangma bad ruh u kyrtong shimet u Laben Ch Marak.
Lah ruh ban kdew hangne ba ka jingbishar bniah ïa ki kot ki sla jong ki kyrtong kan long ha kane ka sngi Palei, ka 28tarik u Lber, 2024.
Ka tarik ba ki kyrtong ki lah ban weng kyrteng noh ïalade na ka jingïakhun kan dei ha ka 30tarik Lber, 2024.
Lah ruh ban kdew ba ka Meghalaya kaba hap lang ha ka Phase – 1 kan thep vote ha ka 19tarik Ïaiong mynta u snem katba ka jingniew vote pat kan long ha ka 04 tarik u Jylliew, 2024.