Shillong, Lber, 27: U MLA jong ka North Shillong Constituency Bah Adelbert Nongrum ha ka sngi Baar u la phah da ka jingthoh sha u Symbud Myntri Rangbah uba khmih ïa ka tnat Pynroi Sor Bah Sniawbhalang Dhar bad sha u Myntri ka tnat PHE u Marcuise N. Marak da ka jingkyrpad ba kin wad ïa ki lad ki lynti ban weng ïa ka jingkyrduh um ha ki shnong kiba dang hap hapoh ka North Shillong Constituency.
Ha ka shithi ba la phah sha ki arngut ki Myntri ka Sorkar Jylla, u Bah Nongrum u la ïathuh ba kum u Nongmihkhmat paidbah u la ïoh ka jingujor na ka Dorbar Shnong Jaïaw Pyllun, ka Riatsamthiah, Wahingdoh bad na kiwei kiwei de ki shnong kiba la mad ïa ka jingkyrduh um ha kane ki sngi.
“Nga kyrpad ïa ka tnat PHE bad ïa ka tnat Urban Affairs ba kin ïatreilang khnang ba ki paidbah nongshnong kin ym mad ïa ki jingeh ha kaba ïadei bad ka jingkyrduh ka umbam umdih ha kum kane ka aiom ba rang tyrkhong ka bneng,” u la ong.
U la kyntu ruh ba kin phah ïa ki nongtrei ban wad ïa ka daw tynrai halor ka jingkyrduh um bad ong ruh ba ki don ki jaka ba ka um ka shu shlei kai katba ki don pat ki jaka kiba mih duna bha ka um bad mad ruh ïa ka jingtyrkhong.
