Lap ar tylli ki metïap bar jylla ha Ichamati, jia ryngkhat ha ka sngi pyrshah CAA ka KSU

Shillong, Lber, 27: Ar tylli ki metiap jong bar jylla la lap ha ka sngi Balang ha ka shnong Ichamati bad Dalda kaba hap hapoh ka Shella Police Station, East Khasi Hills District.
Kane ka la jia ryngkat ha kane ka sngi ba ka Khasi Students Union (KSU) bad kiwei ki seng bhalang katei ka thain ki la pynlong ïa ka jingïalang ha ka por mynsngi ban pyrshah ïa ka Citizenship (Amendment) Rule, 2024.
La suba ba ki runar ki la shim kabu ha kane kajuh ka sngi ban dkhat jubor ka jingim jong ki arngut ki bar jylla.
Katkum u kyrwoh ba la phah da u Superintendent of Police ka East Khasi Hills District u Rituraj Ravi, ki arngut ki bar jylla ba la suba shah pynïap ki dei kiba la tip kyrteng kum u Esan Singh bad u Sujit Dutta. Ïa ka met ïap jong kine ki arngut la lap na ka shnong Ichamati bad Dalda.
U SP u la pyntip ba ki Pulit ki la pynlong ïa ka jingtohkit kaba bniah bad ïa ka Post -mortem ym pat leh satia.
Halor kane ka jingjia, ki Pulit ka Sohra bad Shella bad kynthup ruh ki Pulit na Shillong ki la hiar sha ka shnong Ichamati bad Dalda kiba don ha khappud bad ka ri Bangladesh ban pynkhlaiñ ïa ka jingpahara bad ban pynneh ïa ka shongsuk shongsaiñ.
Kumba ka long mynta, ka jinglong jingman ha ka shnong Ichamati bad Dalda ka la pynsyier mynsiem ïa ki nongshong shnong khamtam ïa ki bar jylla.
Namar ka jingdon jong ka elekshon Lok Sabha, ki bor synshar ka Sohra Civil Sub-division ki lah ban pynjari da ka Section 144 CrPC ban tem ïa kino ki jingïakulmar bad ban pyrkhing ïa ka leit ka wan, ka jingïalum briew shi jaka bad ka jingrah ïa ki tiar pynmynsaw.
Shuh shuh na ka liang ka Tnad Pulit ka jylla , ka la phah ïa ki kali Bullet Proof jong ki Special Operation Team (SOT) lem bad ka kynhun Crime Scene Unit sha Ichamati, Shella, ban ïarap ïa ki Pulit na Shella Police Station ha ka ban tehlakam ïa ka jinglong jingman hapoh ka thaiñ.
Ka jinglong jingman ha Ichamati kala shongsyier bha bad ka jingïaumsnam ka lah ban khie ha kane ka thaiñ hadien ka jingshah bom iap kitei ki arngut ki bar jylla hynne ka janmiet.
Ka jingbthah kala mih na ka Tnad Pulit sha u Superintendent of Police ka East Khasi Hills, ba un hukum ïa baroh ki field unit ba kin pynkhlaiñ ïa ka jingïaid pahara da ka kjat bad kali ruh khamtam mynta ka miet kumjuh ban pyni ïa ka jingdon ki Pulit ha katei ka thaiñ.
La bthah ruh ba ki Pulit ki dei ban rah lang ïa ki riot gear, tyndong lyer pynsat khmat, ki lathi, ki shield bad kiwei kiwei bad ban leh tyngeh ïa ki nongpynkular shnong namar kane ka jingjia, ka lah ban lam sha ka jingiaumsnam pher Jaidbynriew.
Kane ka jingbthah na ka Tnad kala kren ruh ïa ka jingdonkam ban pynlong ia ka jingïalang wanrah jingsuk lashai ka sngi ha Ichamati.