Plie u MR ïa ka jingtei thymmai ïa ka Capt. Williamson Sangma Govt. College bad Hostel

Tura Lber 4: U Myntri Rangbah ka jylla u Conrad K Sangma, mynta ka Lah Sngi U Blei ula plie ïa ki kamra klass (Academic Block) bad ïa ki ar tylli ki hostel jongki Shynrang bad Kynthei jongka Captain Williamson Sangma Government College ha ka jingïalang kaba la long ha ka katei ka college.
Kiba la ïadon lang ha kane ka jingplie ïa kane ka ïing ba thymmai jongka College kaba la pyndep ban tei tang hapoh san snem ki long u Myntri ka tnad pule puthi u Rakkam A Sangma, u MLA ka Baghmara u Kartush R Marak, u MLA ka Amlarem & u Chief Advisor jong ka Sorkar Jylla u Ma Lakhmen Rymbui bad u Chief Secretary ka jylla Bah DP Wahlang.
Haba kren ha ka jingïalang u Myntri Rangbah ula ai burom ïa la u Kpa u (L) P.A Sangma ha kum kane ka sngi kaba dei ruh ka lyngkhuh sngi iap kaba 8 jongu da kaba ong, “Ka dei ka jingïohi jngai bad ka jingngeit jong u (L) PA Sangma ula shim khia ban kyntiew shaphrang ïa ka pule puthi ha ka jylla bad ula buh ïa u maw nongrim ïa kane ka College ha u 2008 bad kumta ka long kaba ïahap bha ba ha kum kane ka sngi ba ïa katei ka projek la sdang ha u 2008 ka la ïaid ha ka lynti kaba dei bad ngi la lah ban plie ïa ki jingtei na ka bynta ki jingpule ha ki kyrdan kiba heh na ka bynta ki samla bad ki paidbah jong ka South Garo Hills.”
Ula pynpaw ka jingsngewnguh a u Myntri barim ka pule puthi jong ka sorkar kaba la dep u Ma Lahkmen Rymbui bad ïa ka kynhun kiba la wanrah ka jingpynkylla ha ka pule puthi bad ula ong ba ka thong bad ka jingïohi jngai kaba la buh da ka tnad pule puthi ha ki 5 snem kiba la dep la shim bad pynïaid shaphrang haduh kine ki sngi kiba mynta.“Nga ngeit skhem ba ha ka liang ka pule puthi yn ïohi ïa ka jingkylla kaba radbah ha kine ki sngi ban wan hapoh ka jingïalam jong u Myntri uba mynta” ula ong.
Ula ong ruh ba ki samla ki long ki atiar kiba kordor bha hynrei ka long kaba donkam ban ai ïa ka rynsan kaba dei, ki kabu bad ki jingbtin lynti khnang ba kin lah ban pyndonkam ïa la ki buit bad ki bor, ki sap ki phong jongki. Ula ong, ba ka pule puthi ka dei ka mat kaba hakhmat eh kaba ka sorkar ka buh hakhmat bad kumta ka sorkar ha u 2020 ka la kytiew ïa ka jingbhah tyngka ha ka pule puthi na ka 27 Klur tyngka sha ka 350 Klur tyngka bad ka sorkar kala bhah kyrpang ruh 3000 Klur tyngka na ka bynta ki jingpynlut ha kaba ïadei bad ka jingkyntiew ïa ki samla ha ki bynta bapher bapher.
U Myntri Rangbah ula ïathuh, ba ula leit jurip ïa ka Baghmara College ha u snem 2019 bad lap ba ka jingtei kam long satia kaba shngaiñ na ka bynta ki samla pule khamtam haba ka la dei kaba la rim bha bad sdang tor.
“Nga dap da ka jingkmen ba hapoh 5 snem, ngi la lah ban pyndep ïa ki jingtei kiba thymmai ïa ki samla bad ki paidbah jongka Baghmara,” ula ong ba ka Kynhun Myntri shen kan sa ai ka jing mynjur ïa ka jingtyrwa ban buh ïa ka Science bad Commerce Stream ha Sohra, Williamnagar bad Baghmara College.
U Myntri Rangbah ula kyntu ïa ki nonghikai bad ki samla pule ba kin shim lang ïa ka jingkitkhlieh ban pynlong ïa kane ka College kum kata ka ‘Centre of Excellence’.
Katba u Rakkam A Sangma, ula ong ba ka dei ka sngi ka ban sah jingkynmaw na ka bynta ka Baghmara bad South Garo Hills baroh kawei bad ula pynkynmaw shaphang ka jingïaid lynti haka jingseng ïa ka college .
La sdang ïa ka Captain Williamson Government College ha u snem 1994 bad la pynïaid da ka sorkar jylla naduh u snem 2008 bad ha ki snem kiba hadien ka sorkar ka la rai ban kyntiew noh ïa ka Captain Williamson Memorial Government College ha ka jinglut jingsep kaba kot 10.80 Klur tyngka, ka jingthmu ka long ban ïaid ryngkat bad ka jingbthah jong ka NEP 2020 ban pynbiang ïa ka jingpule ha ki laiñ bapher bad ban kyntiew ïa ka GER ha ka Higher Education ha ki District da kaba thaw ïa ki Academic Block kiba thymmai.
Ka jingbuh dor haka Tender na ka bynta ki jingtei la mang 8,51,65,956.00 tyngka bad la pyntrei bad khmih bniah lyngba ka State Higher Education Council (SHEC) bad lyngba katei ka jingbhah tyngka ka sorkar jylla kala thaw ïa ka Academic Building kiba kynthup ïaka kamra pule, library, laboratory & jaka leit shabar ryngkat bad ki jaka shong bad ki tiar ki tar kiba thymmai.
Ki samla pule kiba pule ha ka Arts ki don 1180 ngut bad da ka jingthmu ban sdang ïa ka Science bad Commerce Stream la khmih lynti ba ka jingwan pule ki samla kan kiew bha bad ka College kala sdang ïa ki kam ki jam ban sdang ïa ka jingpule Honours Course ha ka B.Sc. bad B.Com bad la phah ruh ïa ka jingtyrwa sha ka sorkar jylla.
ïa ka jingtei ïa ka Girls’ & Boys’ Hostel ha Captain Williamson Memorial Government College la bei tyngka da ka NEC ha ka jinglut jingsep kaba kot 1.20 Klur tyngka. Ha kine ki hostel ia mynta ki ngiam tang 20 ngut ki samla pule shynrang bad 20 ngut ki samla pule kynthei.