Shillong, Lber 4: Ka UGC- Malviya Mission Teacher Training Centre (MMTTC) bad ka Department of Biomedical Engineering jong ka North Eastern Hill University (NEHU), Shillong kila pynlong ïa ka ‘Short Term Course’ halor ka “Telemedicine and Digital Health” bad ïa kane ka jingai jinghikai la sdang mynta ka Lah Sngi U Blei.
Kane ka ‘Short Term Course’ kala sdang ha ka 4 tarik bad kan kut haka 9 tarik u Lber ha kaba 30 ngut kila wan ban ïashim bynta kiba kynthup ïa ki nonghikai bad ki Scholar na kylleng ka ri.
Ki riewshemphang na kylleng ki jaka ai jingsumar kiba paw ha ka ri ryngkat bad ki riewstad kila sam ïa ki jingtip bad jinghikai sha ki nongïashimbynta ha kane ka jingai jinghikai kaba shi taiew.
U Coordinator jong kane ka ‘Short Term Course’ u Dr. Dinesh Bhatia ula pynpaw ïa ki jingmyntoi ki ban ïoh na kane ka jingai jinghikai bad kan ïarap ha ka ban kyntiew ïaka jingnang bad jingstad bad kumjuh ban kyntiew ïa ka sap ka phong.
I Prof. Quendarisa Kharbuli, Director Incharge kala pynpaw ïa ki kamram jong ka UGC-MMTTC Centre bad kumno ka leh ïa la ka bynta ban kyntiew ïa ka sap ka phong bad ïa ki jingnang jingtip jong ki nongïashimbynta kiba wan ha ki Course ki bapher bapher kiba la wanrah da ka Centre baroh shisnem.
U Prof. S.S. Ray u Head jongka Biomedical Engineering Department uba long ruh u Symbud Kongsan, ula ïaroh ïa ki kam kiba la trei da ka Artificial Intelligence ha ka koit ka khiah ha une u spah snem uba mynta bad ula pynpaw ba ki kor teknoloji kila pynwandur ha ka liang ka koit ka khiah ha ka ban pynïadei hapdeng ki nongpang bad ki nongai jingsumar.
