Nongstoiñ, Lber 5: Kum shi bynta ban kyntiew ïa ka sap ka phong, ba ki paitbah nongshong shnog jong ka West Khasi Hills ki don bad ban pynïajan ïa ki bad ki nongai kam, ba kin long ki nongïoh jingmyntoi na ka bynta kito ki nongshong shnong kiba seng ïa ki kam la jong da kaba ïeng ha la ki kjat, ka Meghalaya State Skill Develoment Society mynta ka sngi hat majai ka la sdang ïa ka prokram ba ar sngi kaba la pynlong ha madan shnong New Nongstoiñ.
Ha kane ka sngi shuwa ban sdang ïa katei ka prokram, la pynlong ïa ka jingïalang ha kaba la pynïaid da ka Miss Banri Rani Project Manager jong ka MSSDS ha ryngkat ka jingïadonlang jong ka kong A.Kharbudon Programme Manager jong ka SANKALP & MSSDS, I ba la ai ruh ka jingkren bad pynshai ba ka jingpynlong ïa katei ka programe.
Haba ai jingkren I la ong ba kane ka lympung kam dei tang na ka bynta ba ki riew don sap ba kin wan ban shu pyni nam ïa ki tiar ki tar ba ki la shna. Hynrei ka dei ruh ka prokram kaba ai jingmyntoi ïa kiba kwah ban kyntiew shuh shuh ïa ka sap ba ki don, da kaba shim jingmut bad pan ki lad jingïarap na ki riew shemphang kiba la wan ban ïashim bynta ha katei ka prokram. I la ong ruh ba ki lah ruh ban ïoh ïa ki lad jingïarap na ka sorkar lyngba ki tnad trei kam kiba dei peit ïa ki jingdonkam jong ki samla.
Ha kajuh ka por la ïoh ïa ka jingkren na ka kong Nambie Jesica Marak ha kaba ka la ai mynsiem ïa ki samla jong ka District, ba ki dei trei shitom lada ki kwah ban kyntiew ïa ka ïoh ka kot lyngba ki sam ba ki don la ka dei ha kino kino ki jait jingtrei.
U bah Valentine Swer MCS Additional District Magistrate ka West Khasi Hills, haba ai jingkren ha kane ka sngi kum u kongsan, u la ong ba bun ki samla kiba la pyndep ïa ki jingpule bapher bapher kim sngew thikna shuh, namar ban wad kam sorkar ka la shem jingeh haduh katta katta hynrei lada ki pyndonkam hok ïa ka sap kaba ki don ban trei ïa kino kino ki kam, ka don ka lad na ka bynta jong ki ba kin kiew ha ka jingim kaba man la ka sngi.
Nalor kata u la ong ruh ba ha kine ki sngi ki don shibun ki jylla hapoh ka ri bad shabar ka ri ruh, kiba don kam shibun ki nongtrei bad ka por ka la dei ïa ki samla jong ka District bad napoh ka jylla, ba ki dei ban phai khmat sha kiwei pat ki jylla ym ban khmih lynti tang ha ki jaka la jong.
U la kyntu ïa ki samla ba haba ki trei ïa kano kano ka kam la ka dei ka kam sorkar, ka kam ha ki Kompeni ne ka kam jong ki trei shimet, kim dei ban trei tang na ka bynta ka jingmyntoi jong ki. Hynrei ki dei ban don ka jingkut jingmut ba kin trei na ka bynta ban kyntiew bad pynkhraw ïa ki nongai kam, khnang ba kan long ka jingmyntoi ïa kiwei pat.
