Nongstoiñ, Lber 5: Ka KSU Nongtrai Sepngi Unit hapoh ka jjngïalam u samla Kitbor Riangtem President, ha ka sngi hat majai ka la leit ïakynduh ïa ka kong E.G.Tariang Pajat DMHO West Khasi Hills bad ka la dawa ba kan ïarap ban shna noh ïa ka Sub Center ha ka shnong Langdongdai.
Ki nongïalam ka seng ki la ong ba haduh mynta mynne katei ka shnong kaba dang hap ha ka thaiñ West Khasi Hills District, kam pat don satia wat tang kawei ruh ka jaka ai jingsumar na ka bynta ka koit ka khiah. Bun ki briew kiba pang kiba shitom ki hap leit kit shaduh Riangdo kaba jngai kumba 38 km ei ei nalor ka surok ruh ka dang khohruh khohram bad ka shim por kumba 2 kynta ei ei. Ka seng ka la ban jur ba dei ban leh noh mardor namar ka long ka dong ka thaiñ kaba dang sahdien haduh katta katta. Ha jingïakynduh jong ka seng, ka DMHO ka la kular ban leh ïa ka ba donkam bad kan sa pynsngew ruh ïa kane ka mat ha ki bor kiba kham halor.
