Pynkup burom ka PNB-RSETI ïa 47 ngut ki Bank Sakhi kiba la pyndep ïa ka jingshah hikai

Shillong, Lber 05 : Ka Punjab National Bank Rural Self Employment Training Institute kaba don ha Mawphlang East Khasi Hills District hynne ka sngi Ba ar ka 5 tarik Lber 2024 ka la pynkup burom ïa ki 47 ngut ki Bank sakhi lane ki Business Correspondent kiba la pyndep ïa ki jingshah hikai ha katei ka shlem ai jinghikai lyngba da ki syrnot bad ki jingai mynsiem.
Ïa kane ka jingïalang pynkup burom la pynlong ha phyllaw jong katei hi ka jaka, ha kaba ka Kong Rosetta Mary Kurbah Deputy Commissioner ka EKHD ka la long kum ka Kongsan ha ka jingïadonlang ka Kong Jacqueline FJJ Nongkhlaw kaba dei ka Director.
Kiba ïadonlang ha kane ka sngi ki kynthup u Assistant Manager ka NABARD, Lead District Manager, Chief Manager ka PNB Shillong Branch, Branch Manager PNB Umlyngka Branch, Branch Manager SBI, Mawngap Branch, Branch Manager MRB, Mawngap Branch, ka Principal Secondary School, Mawphlang, ki heh ka MSRLS, ki nongtrei ka PNB RSETI bad kiba la pyndep ïa ka jingshah hikai.
Ka Kong Rosetta Mary Kurbah haba kren kum ka Kongsan ka la ai khublei ïa baroh kiba la pyndep ïa kane ka jingai jinghikai kaba dei ka bynta ba kongsan tam khamtam na ka bynta ki shnong nongkyndong. Ka la ong ba ka kam jong ki Bank Sakhi ka long kaba donkam tam ban ïarap khamtam ïa ki paidbah ha ki thaiñ nongkyndong kibym don ïa ki jaka kynshew pisa. Ka la kyntu ba kin ïatreilang ryngkat ki bor shnong, ki BDO bad ka tnad C&RD.
Ka jingdon jong ki Bank Sakhi ka ïarap shibun ïa ki paidbah ha ki shnong nongkyndong kiba donkam ban kynshew pisa.