Shillong, Risaw 28 : Ki arngut ki Symbud Myntri Rangbah ka Jylla kiba dei ruh ki nongïalam ba hakhmat ka National People’s Party (NPP)ha ka sngi Balang ki la kob ba ki sngewskhem ba ka party kan sa synshar hi marwei hadien ka elekshon MLA ha u 2028 khlem da donkam shuh ïa kiwei ki party ban synroplang.
Ïa kane, kine ki Symbud Myntri Rangbah ba kynthup ïa u Bah Prestone Tynsong bad Bah Sniawbhalang Dhar ki la pynpaw haba kren ha ka jingïalang pdiang burom ïa ki lai ngut ki MLA ba thymmai ba wan pynïasoh sha ka party.
“Shen, ngi don ka jingsngewskhem ba ka party kan ïoh ban synshar hi tang marwei ha ka sorkar,” ong u Bah Prestone.
Katba na ka liang u Bah Sniawbhalang pat u la ong, “Ngi don ka jingsngewtikna ba ha ka elekshon 2028 ngin sa ïoh ban jop bun tam ki MLA.” Ha kajuh ka por u la pynpaw ka jingsngewkmen ba lyngba ka jingwan pynïasoh jong ki lai ngut ki MLA ba thymmai sha ka NPP ka jingïoh jingshaniah jong ka party ka la nang kiew stet.
Ha shwa kane, u Bah Prestone u la ong, “Ka jingwan jong ki kan pynkhlain ïa ka party ha baroh kawei ka jylla. Ngi la tip bha shaphang jong ki, ka jinglah jong ki bad ka jabieng ba ki don la ka long ha Ïing Dorbarr ne shabar jong ka.”
Shuh shuh u la ong ba kane kan ïarap shuh shuh na bynta ka elekshon shiteng samoi. “To ngin sdang ban trei namar kane ka elekshon shiteng samoi kam slem shuh. U Dr. Nonglait dei u kyrtong MP jongngi, kumta ngi sngewskhem ba ngin ïoh ïa ka jingjop ba donburom ha kane ka elekshon,” u la ong.
Kumban shu kdew hangne, ka NPP mynta ka la don haduh 36 ngut ki MLA kata kynthup lang ïa ki lai ngut ki MLA kiba la dep ban pdiang burom ha kane ka sngi.
