Shillong, Kyllalyngkot 16 : U Myntri Rangbah ka jylla u Conrad K Sangma mynta ka Lah Sngi U Blei u la plie ïa ka Engineering College ba nyngkong eh ha ka jylla kaba dei ruh ka College jongka sorkar ha Mawlai Kynton Massar, Shillong, East Khasi Hills. La ïadon lang ha kane ka jingplie ïa kane ka college da u Myntri ka tnad pule puthi u ma Lahkmen Rymbui.
ïa kane ka College la tei na ka skhim Rashtriya Uchchatar Shiksha Abhiyan (RUSA) ha ka jinglut kaba 26 klur tyngka. Kane ka College ka don ha ka jaka ba 7.8 acre bad ka don ruh hapoh phyllaw jongka Shillong Polytechnic kaba don haduh 16.11 acre ka jaka hangtei ha Mawlai Kynton Massar.
Haba kren haka jingïalang u Myntri Rangbah u la ong ba ka sorkar ka phai khmat beit sha ki samla ha kine ki san snem bad na kata ka daw ka pyrshang ban wanrah ïa ki skhim bad prokram ban kyntiew ïa ki samla.
U la ong ba ka sorkar ka la wad bniah bad ïamir jingmut bad palat 90 hajar ngut ki samla bad dei halor kane ka la wanrah ïa kine ki prokram bapher bapher ban ïarap ïaki samla. Kine ki prokram ki long naduh ka seng kam seng jam, ka jingkyntiew ïa ka kam ïalehkai sport, ka put ka tem ka rwai ka siaw bad bun kiwei kiwei.
“ Ki samla ki long ki mawkordor bad ka bor jong ngi lada ngi nang ban pyndonkam ïa ka jingstad bad ka bor jongki ha ka lynti kaba dei. Ngi lah ruh ban pynthikna ba ka Meghalaya kan long kawei ka jylla kaba tbit tam ha ka ri lada ki samla ki biang nadong shadong namar dei ma ki kiba long ka lawei jongka jylla” ong u Myntri Rangbah.
U Myntri Rangbah u la batai bniah ruh kumno ba la nang kyntiew shuh shuh ïa ka pule puthi ha ka jylla da kaba pyntreikam ïaki prokram ki ban ïarap ym tang ban khlaiñ ka met ka phad hynrei wat ka jingproh jabieng ruh naduh ki khynnah skul haduh ki samla pule.
U la ong lada ngi dang khmih lynti ba ngin pynkhlaiñ ia ïa jingpule ynda la dap 20 snem ka rta yn ym ïoh ïa ki samla pule kiba tbit dei na kata ka daw ka sorkar ka la pyntreikam da ki prokram bapher bapher ban pynthikna ba ka jingbam ïa ki khynnah ka dei ban biang naduh dang rit ban khlain ka jingmut jingpyrkhat bad bor jabieng jongki ruh.
U la ong ba ka sorkar kan ïaleh katba lah ban phai khmat sha ka jingkyntiew ïaka pule ka dang leh namar kane kan kyntiew ïa ka jylla ha baroh ki liang. U la pynbna ruh ba ka sorkar halor kane ka nongrim ka la plie ruh ïa ka University ba nyngkong eh jongka jylla ka Captain Williamson Sangma State University dang hakine ki khyndiat sngi ha Balalgre, Tura.
Kane ka Engineer College kan sdang shwa lai tylli ki tnad pule kata ka Civil Engineering, Electrical Engineering, bad ka Mining Engineering bad ki samla pule kin long mar laiphew ngut kawei kawei ka tnad pule.
Ka sorkar ka la pynkhreh 55 tylli ki post kata 36 ki Nonghikai, 19 ki ban peit ïa ki Ophis. La pan jingbit ruh ïa kane ka college na ka NEHU bad ka jingpynbit pynbiang ka la ïaid shakhmat.
Na ka bynta u snem 2022-2023 ka Shillong Govt. College of Engineering (SGCE) ka la pan jingbit ruh lyngba ka Online na ka AICTE ban sdang ïa ki Technical Course.
