Shillong, K’lyngkot 16: U Bah Ardent Basaïawmoit, President ka VPP haba kren ha ka jingïalang paidbah ha Madan Polo, u ong ba hadien ba la mih ka Seng Voice of the People Party (VPP) ki la don kiba kynthoh ne sin kum ka Very Poor Party (VPP).
Hynrei u la ong ba wat haba don kiba kynthih ne sin kumne ruh um sngew eiei, namar kadei ka Party ka trei da ka lynti kaba khuid bad suba bad da ka mynsiem ban shakri hok ïa u paidbah.
Mynta ka sngi ha ka jingïalang paidbah ha Polo ruh, ki paidbah ki la wan da la ka mon sngewbha bad sei hi ka bai leit bai wan nalade. Ha kane ka jingïalang ka Seng kam shym la wat tang ka sha ruh, pynban u paidbah u la shong beit thok nadih ka por 1 baje haduh ka por 4 baje janmiet.
“Ban dei ba pynlong jingïalang kiwei ki Party, katne u paidbah la lut da ki lak bad ki klur, hynrei ka VPP ka khlem ai ei ei ïa ki, baroh ki la wan da ka mynsiem sngewkhia ïaka ri bad ka jaidbynruew”, la ong u Bah Ardent.
Kumta ha shuwa ban wai ka jingïalang haba la mih ka jingkyrpad ban ïarap lem na ka bynta ka jinglut na ka bynta ba wai shuki bad ka rynsan, u paidbah u la ïeng puk ban leit shakhmat ban thep ha ki borti heh ban noh synñiang ryngkat ka jingpyrta “Ngin ai eh eh daw na ka bynta ka VPP”.
