Mawkyrwat, Ïaïong, 05: U bah Renikton Lyngdoh Tongkhar, Nongmihkhmat jong ka Mawkyrwat Constituency uba long kum u kongsan mynta ka sngi ka 5 tarik u Ïaïong, 2023 u la plie paidbah ïa ka jingtei ba thymmai jong ka ïing skul kaba don ha shnong Phlangkynshi, South West Khasi Hills District kaba ki la ai kyrteng ka Phlangkynshi Government Lower Primary School kaba dei ha ka jingmang pisa kaba T. 37 lak tyngka ba la pyntrei da ka projek School Infrastructure Upgradation Project ba la bhah na ka State Scheme jong ka sorkar Meghalaya.
U bah Renikton Lyngdoh Tongkhar, Nongmihkhmat jong ka Mawkyrwat Constituency haba kren ha ka jingïalang u la pynpaw ka jingsngewnguh bad jingaikhublei na ka bynta ki nongpynïaid kiba dei napoh ka ophis jong ka District School Education Officer (DSEO), South West Khasi Hills District kiba la trei shitom ban pynurlong katkum ka jingthmu ha ka ban shna pynbha da kaba tei ïa ka ïing skul kaba thymmai jong ka Phlangkynshi Government Lower Primary School ka ban long ka jingïarap ïa ki hep kiba rit kiba don ka jingthmu ban pynkiew ne ban wad ka jingnang ka jingstad.
Ha kajuh ka por u la pynpaw ruh ka jingkhublei na ka bynta ki kmie ki kpa kiba long ka daw bah ban long ka jingkiew na ka bynta jong ki jaka pule lyngba ka jingphah jong ki ïa khun ha ki jaka pule ba ka sorkar ka la dep ban buh ha ki shnong ki thaw. Kumta haba ka sorkar ka buh ïa ki skul kam ju buh kai ïa ki hynrei ka kwah ba baroh ki khynnah rit kin ïoh ïa ka jingnang ka jingstad. Ha kawei pat ka bynta u la pynpaw ruh ka jingsngewsiaw namar ba bunsien hi ki skul sorkar la ha kino kino ki shnong ki long ki ïing skul kiba jot rathai bad kiba kham bha pat ki dei ki skul ba la pynïaid da ki ‘riew shimet, namarkata, na ka liang ka sorkar haba ka ïohi ïa kane kam shym la shongthait hynrei ka don la ka jong ka bynta ban leh bad mynta bun ki skul sorkar ki la sdang ban wan dur biang ha kaba ki la don la ka bhah ban pynbha khnang ba ki khun hep kiba rit kin ïa ka lad ban pynleit ïa ki jingmut jingpyrkhat ha ka pule puthi bad ba kin ïoh ban ïeng ha la ki jong ki kjat ha ki sngi ki ban sa wan.
Namarkata, u la buh ruh ka jingkyrpad ïa ki paidbah nongshong shnong ba ai ba ki skul sorkar kin nym long kiba skul kiba don tang ka jingtei suda hynrei ki dei ruh ban don ka jingïohi jngai ban phah ïa ki khun ha ki skul pule khnang ba ka lawei jong ki khun ki kti kan long kaba phyrnai. Ha kaba ïa dei bad ka jingdon jong ki skul ha ki shnong ki thaw, u bah Renik u la buh ka jingkyrpad ba ki skul shimet ne ki skul ba la seng da ki Balang ba ki dei ban don ka jingïatreilang bad ki skul sorkar lyngba ka jingdon jong ki khynnah pule khnang ba kan long ka jingmyntoi ha kiba bun ki liang ha ka ban pyntyllun ïa ki kam jong ka pule ka puthi. “Ka sorkar mynta kam thung shuh da ki nonghikai kiba shu pass tang ha ka PU hynrei da ki nonghikai kiba la pyndep ïa ki jingpule kiba kham ha jrong kum ka MTET”, ong u bah Renik.
Haba pynkut ïa ka jingkren, u la kyntu ba ki khynnah skul, ki nongpynïaid skul, ryngkat ki paidbah ki dei ban don ka jingïatreilang ha ka ban peit ïa ka bha ka miat jong kane ka ïing skul da kaba long kiba phikir ba kan nym don kano kano ka jingshah pynjot ne shah leh khlem akor ha kane ka skul.
Ha kaba ïa dei bad ka jingthmu ban don sa ka Upper Primary School Level, u bah Renikton Lyngdoh Tongkhar u la kyrpad ba kum ki nongpynïaid skul ki dei ban ïaid da ka lynti lyngba ka jingleit ban twat jingmut napoh ka ophis jong ka District School Education Officer (DSEO), South West Khasi Hills District khnang ba ki jingthmu kin long kiba ïaid beit ïaid ryntih.
Ïa ka khana lyngkot ne History jong ka jingïaid lynti jong ka Phlangkynshi Government Lower Primary School la pule da u bah Deepland Shylla uba dei u Secretary jong ka Managing Committee ha kaba u la ïathuh ba la sdang ïa ka Phlangkynshi Govt. L.P. School ha ka snem 1962 da ka jingkyrshan jong u Khaw Kham lyngba ka Jingïaseng Kynthei Circle Jakrem ha kaba u babu Kren Syiemlieh na Dewlieh u la hikai nyngkong eh ha kane ka skul nangta u babu Living Shangdiar nangta hadien pat sa u babu Klingson Rani uba la kynriah shnong noh sha Sohliya Ribhoi District, ha kaba ym don jingtip tikna ïa ka por ba ki la trei ha kine ki snem kiba sha khmat. Dei tang ha ki snem 1983 ter ter ba la hikai pat da u babu S. Lartang bad kong Biloda Iawphniaw ha kaba ka District Council ka la shimti bad pynïaid hi noh ha ka por ba long CEM ka KHADC, u bah Bak Wanniang ha kaba la khot kyrteng ïa ki skul kiba ka la shimti ki D.C.L.P. School.
Nangta, hadien ka jingbymbeit bad dkoh ka rukom pynïaid ïa kine ki skul hapoh ka jingpynïaid ki Administrator ka ïa don ka jingkhih win ha ki skul namar ka jingbym biang ha ka tulop. Ha ki snem 1993 – ‘94 ha ka por ba long Director of Elementary and Mass Education, u bah Tourist Mark ula khot ïa ki skul ban aiti noh ha ka jingpynïaid ka sorkar.
Kumta ka Phlangkynshi Govt. L.P. School ha kata ka por ka hap ha ka jingpeit bad khmih u Rev. S.I. Iawphniaw kum u Secretary ka Managing Committee bad ba ula aiti noh sha ka sorkar. Hadien ba la shongthait (retired) u babu S. Lartang la thung pat ïa u bah S.R. Marngar bad hadien ka jingkhlad jong u, la thung pat ïa bah John Peter Syiemlieh.
Hadien ka jingshongthait noh ka kong Biloda Iawphniaw ha ka snem 2012 la thung ïa bah Sentibor Lyngdoh kum u Contract Teacher haduh ka snem 2020. Ha kine ki snem kiba la leit ka skul ka don tang 2 ngut ki Regular Teacher hynrei naduh ka snem 202l ka sorkar ka la nang bhah shuh shuh sa ar ngut ki Regular Teacher ha kaba u Deepland Shylla, Head Teacher, ka kong Diana Rose Syiemlieh, Asst. Teacher, ka kong Naitphulsy Thongni bad u bah John Peter Syiemlieh watla ym shym la wan shuh sha skul naduh ka snem 2021.
Ha kawei pat ka bynta lah ban kdew ruh ba wat hapdeng kita ki jingeh kiba bun ba kum ka skul kaïa kynduh hynrei kane ka skul ka la roi shibun ha kaba ka la pynmih ïa ki khun kiba la nang la stad kiba trei ha ki kam sorkar bapher bapher. Ka skul ka la kynjoh sha ka arta kaba 61 snem haduh kane ka por.
Ha une u snem 2024 u ban wan kane ka Phlangkynshi Govt. L.P. School kan sa kiew noh sha ka Upper Primary School Level. Kumta ki kyrpad ïa ka ophis u SDSEO ban shim khia ban pynbiang ïa ki nonghikai ha ka Upper Primary Level khnang ba ka skul kan nangkiew shaphrang na ka bynta ka shnong Phlangkynshi bad ki shnong ba marjan.
Kiwei pat kiba la ïadonlang ha kane ka sngi ki long u Block Development Officer (BDO), ka Mawkyrwat C&RD Block, u bah I. Lawrynñiang, MCS, ka District School Education Officer (DSEO), ka kong S. Kharsahnoh kum ki symbud kongsan, u Sub-Inspector jong ka ophis DSEO, u bah S. Kharbteng lem bad kiwei de ki ‘riew rangbah, ki longkmie, longkpa bad ha ryngkat ki hep kiba rit kiba dei ki khynnah skul.
Ïa ka jingïalang la pynïaid da u bah Polosstar Marngar bad ka jingkren khublei na kong D. Syiemlieh, Assistant Teacher jong ka Phlangkynshi Government Lower Primary School.