Wan ïashimbynta ki nonghikai skul ha ka Skill Development Awareness Programme jong u DPO

Mawkyrwat, Jylliew 08: Ka ophis jong u District Planning Officer (DPO), South West Khasi Hills District, ha ryngkat ka jingïatreilang bad ka ophis jong ka District School Education Officer (DSEO), South West Khasi Hills District, ka la pynlong ïa ka Skill Development Awareness Programme ha skul Nativity H/S, Mawkyrwat ha kaba ha kane ka jingïalang la wan ïashimbynta da ki nonghikai na ki skul bapher bapher hapoh jong ka Distrik.
La pynlong ïa kane ka jingïalang da ka thong ban pynsngewthuh bad pynshai sha ki nonghikai nyngkong eh khnang ba kin rah ïa ka khubor sha ki khynnah skul bad ki samla pule halor ki lad jingïarap bapher bapher kiba ïadei bad ka jingpynroi ïa ki sap treikam (skill development), ki prokram jingïoh jinghikai kam (vocational training), bad ki lad jingïohkam kiba don lyngba ki skhim jong ka Sorkar.
Ha kaba sdang la pynrung kyrteng ïa ki nongwan ïashimbynta, da kaba pynbud ka jingkren pdiang sngewbha na u Bah F.B. Basan, MCS, District Planning Officer, South West Khasi Hills District. Ha ka jingkren jong u, u la ban jur halor ka jingdonkam jong ka jingpynroi ïa ki sap treikam ban kyntiew ïa ka jinglah ban ïohkam ne ba ki samla ha kane ka juk ba mynta kin lah ban ïeng ha la ki jong ki kjat bad ymdei shuh ba kin ap tang ïa kita ki kam sorkar. Ha kajuh ka por u la ai mynsiem ïa ki nonghikai ba kin long ma ki kin nongrah khubor sha ki khynnah skul bad sha ki samla pule ba kum ki samla ki long kiba shlur ban wad bad shim kabu ïa ki lad kam bapher bapher na ka bynta ka lawei ba bha jong ki.
Ha ka bynta ba nyngkong jong ka jingïalang, u Bah Gordon G. Lyngdoh, Functional Manager, District Commerce & Industries Centre (DCIC), South West Khasi Hills District, u la batai shaphang ka jingkyrshan ïa ki nongsdang kam lajong (entrepreneurship), ki lad jingïohkam da lade bad ki jingïarap bapher bapher ba la pynbiang da ka Sorkar na ka bynta kito kiba kwah ban seng kam lajong.
Ka Kong Uverlyne Kharlyngdoh, District Skill Development Officer, South West Khasi Hills District, ka la ai jingbatai ha ka bynta kaba ar jong ka prokram, ha kaba ka la ai jingtip bniah halor ki prokram ai jinghikai sap treikam, ki vocational courses bad ki lad kyntiew kam na ka bynta ki samla pule bad ki samla bympat ïohkam hapoh ka MSSDS ne Meghalaya State Skill Development Society.
Ha kajuh ka por ka la sam ruh ïa ki jingïathuhkhana shaphang ki jingïoh bad ki jingjop jong ki samla kiba la myntoi na kine ki jingïalang ne jinghikai hapoh ka jingpeit jong ka Skill Development bad da kaba pynshlur ïa ki nonghikai ba kin long ki nongaimynsiem na ka bynta ki khynnah skul bad ki samla pule ba kin shim kabu ïa ki lad jingïarap na ka sorkar.
Ha ka bynta kaba lai, u District Programme Manager, DDU-GKY, u la batai bniah halor ka thong bad ki jingmyntoi jong ka Deen Dayal Upadhyaya Grameen Kaushalya Yojana (DDU-GKY), khamtam eh ïa ki placement-linked skill training programmes kiba thmu ban pynkhlaiñ ïa ki lad jingïohkam jong ki samla nongkyndong.
Hadien kane, la pynlong ïa ka jingïakren bad jingïatai paidbah (interactive question-and-answer session), kaba la ai lad ïa ki nongwan ïashimbynta ban kylli jingkylli, pan jingshai bad ïoh jingtip kham bniah halor ki skhim bad ki lad kam bapher bapher kiba la ïakren ha ka prokram.