Ka jingpynlip bording jong ka Meghalaya Energy Corporation Limited (MeECL) ka la pynsyrtok haduh katta katta ïa ki paidbah nongshong shnong ka jylla namar ba ka jingpynlip bording ka long lai kynta mynsngi bad san kynta naduh ka por 12 baje shiteng synñia haduh ka por 5 baje mynstep. Ka jingpynlip bording ka la ktah haduh katta katta ïa ki karkhan rit, ki nongbuh dukan, ki shlem treikam bapher bapher kiba hap ban pyndonkam da ka bording.
Katkum ka jingïathuh jong u Myntri ka tnat Bording jong ka Sorkar Jylla u Abu Taher Mondal ba ka jingpynlip bording ka dei ba ka Sorkar Jylla kam banse na ka jingduna um shaba palat jong ki wah kiba don ha ka jylla. Nalor kata ka jingpynmih bording hapoh ka jylla ka dang long tang 88 million Unit hynrei ka jingdonkam jong ka bording ka long haduh 200 million Unit bad ka jingduna jong ka jylla ban pynmih ïa ka bording ka long haduh 112 Million Unit. Kane ka dei ka jingeh kaba ka Sorkar ka ïakynduh. Kumta ban pyndap ïa ka bording ka Sorkar kam banse ban hap thied ïa ka bording na ki Kompeni shimet.
Ka jingbym lah ban pynmih kham bun ïa ka bording ka dei na ka daw ka jingbym ïohlad jong ka Sorkar ban shna ïa ki shlem pynmih bording na ka daw ka jingpyrshah jong ki paidbah. Ha ka por jong ki sorkar kiba rim ki la maitphang ïa kane ka mat ban tei ïa ki shlem pynmih bording hapoh ka jylla khnang ba yn dup lah ban pyndap ïa ka bording hynrei ka jingeh kaba mih na kane ka jingthmu babha jong ka Sorkar ka dei ka jingpyrshah na ki paidbah namar lada den ïa ka Wah, ka jingjulor bad ka jingduhnoh ïa ki jaka ki puta kan long kaba jur bha haduh katta katta bad kane ka ktah ïa ki briew kiba hap ban shahniah ïa ka kamai jakpoh na ka rep ka riang.
Lada ka jylla kan ïai mad ïa ka jingpynlip bording tang shu poi ka aiom pyrem ka ladei ka por ïa ka Sorkar Jylla ban wad ïa ki lad ki lynti ban shna ïa ki shlem pynmih bording da kaba pan ïa ka jingïatreilang ki trai khyndew, ki bor Hima, ki bor shnong bad ki kynhun bapher bapher ban pynsngewthuh ïa ka jingdonkam jong u paidbah kaba donkam haduh katta katta namarba ka jingpyndonkam ïa ka bording katba nang mih ki bnai bad ki snem ka la nang jubor haduh katta katta bad lada kan ïai long sah kumne kan buh jingeh hi ïa ki paidbah kiba donkam ïa ka bording baroh 24 kynta.
Ka jingsahram jong ka MeECL na ka jingsam bording ka long kaba shyrkhei bha haduh katta katta na ka jingbym siewdep jong ki karkhana kiba don hapoh ka jylla ïa ka ram kaba kot da ki klur nalor ba ka sorkar ka ai subsidy. Kine ki dei ki jingeh kiba buh ïa ka Sorkar ha ka shyngkan khait namarba ka jingdap ram jong ka Sorkar Jylla ka long haduh ñiuhmat na ka jingbym pat lah ban siewdep ïa ka ram kaba ladep shim mynshwa nalor kaba hap ban pynkhuid ïa ka ram kaba dang shu dep shim thymmai.
Ïa mynta ka MeECL ka dang ïoh jingkyrshan kaba pura na ka Sorkar Jylla namarba ha kiba ki khep ba ka MeECL ka kyrduh pisa ban thied ïa ka bording dei ka Sorkar Jylla kaba ju kyrshan pisa na kawei ka por sha kawei pat.
Ka jingpynlip bording ha ka por shiteng synñia ka la long ka kabu ksiar ïa ki nongtuh nonglute bad ïa ki riewshim kabu kiba ap mrong ban ïoh prong tuh ïa ki ing ki sem jong ki briew. Nalor kata ka buh jingma ruh ïa ki paidbah ha lynti ha synkieng haba ïaid ha ka por mynmiet na ka jingdon jong ki riewshim kabu kiba thmu ban leh ïa ki kam runar ruser ha ka jingdum jong ka miet.
