Pyrto bad pynkup burom ka MSEPDF ïa u bah R.Rymbai (Traffic Incharge) ka Mawkyrwat PS
Mawkyrwat, Jylliew 07: Ka Mawkyrwat Socio Economic and People Development Forum (MSEPDF) ka la pynkup burom ïa u Traffic Incharge jong ka Mawkyrwat Police Station, South West Khasi Hills District, u Bah R. Rymbai, halor ka jingshakri ba hok, ka jingtrei shitom bad ka jingkitkhlieh kaba u la pyni ha ka jingpyndep ïa la ka kamram kum u nongpynïaid kali hapoh Ïew Mawkyrwat.
Kum ka kynhun ka la pynpaw ruh ba u Bah R. Rymbai u la long ka nuksa kaba bha ïa kiba bun ki nongtrei sorkar ha ka dong ka thaiñ, namar ba u la trei da ka jingaiti lut bad ka jingsngewkitkhlieh ban pynbeit ïa ka leit ka wan jong ki kali bad ka jingïaid paidbah ha Ïew Mawkyrwat. Ki paidbah bad ki nongñiah kali ruh ki la pynpaw ïa ka jingsngewnguh bad jingïaroh ïa ka rukom trei jong u, kaba la wanrah ïa ka jingbeit jingbiang bad ka jingshngaiñ ha ka leit ka wan.
Ka MSEPDF, kum ka seng kaba ju peitngor ïa ka roi ka par bad ka bha ka miat jong ka South West Khasi Hills District, ka la ong ba hadien ba ka la buddien bad bishar bniah ïa ki kam kiba u Bah R. Rymbai kiba ula leh, ka la shem ba ka dei hok ban ai ïa kane ka jingithuh bad jingpynkup burom halor ka jingshakri kaba kordor jong u sha ki paidbah ka thaiñ Mawkyrwat.
Ïa kane ka jingïalang pynkup burom la pynlong ha Hall jong ka Sngap Syiem College, Mawkyrwat, ha kaba la donlang shibun ki riew rangbah bad ki nongmihkhmat na ki kynhun bapher bapher.
Ha kane ka sngi, la ïoh ïa ki jingkren na u President ka MSEPDF, u Bah Daross Ramsiej, u Myntri Shnong ka Mawlangwir, u Bah N.S. Wanniang, bad u Bah Wallam Syiemiong. La ïoh ruh ïa ka jingduwai kyrkhu na u Myntri Shnong ka Mawranglang, Bah C. Kharsyiemlieh.
La sakhi lang ïa kane ka jingïalang da ki dkhot jong ki Taxi Association, Tourist Taxi Association, Swift Association, ki Driver Association bad kiwei kiwei ki nongñiah kali kamai jong ka thaiñ. Ïa ka jingïalang la pynïaid da u Bah Skanding Ramsiej, bad la ïoh ruh ïa ka jingkren ai khublei na u Bah R. Rymbai, uba la pynpaw ïa ka jingsngewnguh ïa ka MSEPDF bad ïa baroh kiba la ai ka jingïatreilang bad jingkyrshan ha ka por ba u pyndep ïa la ka kamram.