Nongstoiñ, Jylliew 07: Ka jingdon jong ka scheme Pradhan Mantri Awaas Yojana Gramin (PMAY G) kaba dei kawei na ki lad ai jingïarap ban ai pisa ïa kaban tei ïing tei sem sha ki longïing kiba duna ha ka ïoh ka kot, ka la long shisha ka jingkyrkhu kaba khraw eh ïa u duk u suk u bym shym la kot bor ban shna ïing shna sem. Ïa kane la phla ruh da ki katto katne ngut ki briew kiba la ïoh ïa katei ka scheme ha ka jingïakren bad u nongthoh khubor.
La ong ba katei ka scheme lad jingïarap ka dei kaba wan na ka sorkar kmie bad nyngkong eh la ju tip ïa katei ka scheme kum ka Indira Awaj Yougna (IAY). Ha jingpyrshang ban wad jingtip jong u nongthoh khubor, la ong ba tang ha Nongstoiñ block naduh u snem 2008 haduh 2016 ki longïing kiba la ïoh ïa katei ka jingïarap ki la kot sha ka 1712 ei ei ki longïing
Katba naduh ba lah pynkylla noh sha ka Pradhan Mantri Awaas Yojana Gramin (PMAY G) kata naduh u snem 2016 haduh 2024, kumba 4073 ei ei ki longïing ki la ïoh ïa katei ka scheme jingïarap tei ïing lyngba ka sorkar kmie.
Haba u nongthoh khubor u la pyrshang ruh ban kylli pyrthew na ki katto katne ki longïing kiba la ïoh ïa katei ka jingmyntoi ban tip, la ki la ju shah thok ne shah bam ei ne em ïa ka pisa kaba ki dei hok ban ïoh, haba ka jubab ka la ong em kim shym la shah shukor ei ei bad ki la ïoh ïa la ka bhah baroh.
Ka kong Elbidora Marweiñ na ka shnong Mawiong Lumsyntiew ka la ïathuh ba mynshwa ka don tang ïa ka ïing dieng, hynrei naduh ba ka sorkar ka ai jingïarap lyngba kane ka skhim ka la long shisha ka jingmyntoi. Watla ka ïing ym pat lah ban shna pyndep, hynrei la ïoh ban sdang ban shna katto katne. Ka la long hi ka jingmyntoi ïa ki longïing ba duk bad ka jingïoh pisa ruh ka long saw ne san sien haduh ba kut.
U Bah P.Khardewsaw u la ong ba u la sdang ban shna ïing da ka dieng ha u 2018, hynrei hadien ba ka wan kane ka skhim PMAY bad haba la aplai bad haba ki la ïoh ïa ka skhim, u la pynkylla noh sha ka ïing cement. Ha kaba ïa dei bad ka pisa ym pat don jingshah thok ei ei, hynrei ïoh beit kumba ka sorkar ka la buh bad baroh saw installment ki lait beit kumba ki briew kiba dei peit ki la kren bad wan mih sha ïing jong ngi.
Kumta la sngewthuh ba kane ka scheme kat haduh mynta mynne kam pat don kano kano ka jingdkoh ha ka jingpyntyllun ïa kane ka scheme. Ka la long kaba ïaid beit ïaid ryntih bha ha ka thaiñ hi baroh kawei kynthup sha Rambrai, Mawshynrut bad Nongstoiñ.
Kum ban shu pyntip ba mynta ka kynti katei ka scheme ka la kot sha ki 2 lak 50 hajar tyngka shi ïing. Pynban ïa katei ka scheme yn lah ban ïoh tang lyngba ka kyrteng ka longkmie bad ka ïaid ruh ryngkat ryngkat ka jingïatreilang bad ki nongsynshar shnong.
