Jowai, Jymmang 17: U Symbud Myntri Rangbah ka sorkar jylla u ma Sniawbhalang Dhar uba dei ruh u MLA ka 1-Nartiang Constituency mynta ka sngi Saitjaiñ ula plie ïaka ophis thymmai ne ka ‘Administrative Building’ jong ka Krishi Vigyan Kendra (KVK) (Agriculture Science Center) ICAR-Agricultural Technology Application Research Institute (ATARI) Zone-VII kaba don haka shnong Wahiajer, West Jaiñtia Hills District.
Ha kane ka sngi ki nongrep na kylleng ki jaka jong ka Ri-Lum Jaiñtia kila wan sha kane ka jingïalang haka juh ka por kila ïoh shibun ki jinghikai ha kaba ïadei bad ka rep ka riang lyngba ki jingïarap pisa na ka sorkar India bad pyntreikam lyngba ki KVK kiba don ha kylleng ka Ri, ïa kaba la tip kum ka National Initiative on Climate Resilient Agriculture (NICRA) Worshok.
La ai jingbatai bniah ïa ki nongrep shaphang ka jingtreikam ka KVK lyngba ka jingtreilang bad ka ICAR-ATARI, Zone-VII, Umiam ban pynkiew ïa ka rukom rep katkum ka jingstad jong ka juk lyngba ki Scientist, shuh shuh kila pynsngew ïa ka jingïaid ïew bha jong u Synrai Lakadong ha kylleng ki Ri namar ka jingbha jong u bad mynta ban pynbha sa ka rukom rep ïa u Krai bad u Phan dieng.
Ïa ka National Initiative on Climate Resilient Agriculture (NICRA) ka project Scientific Management ha ryngkat ka jingtreilang jong ki shnong la sdang ïaka naduh ka snem 2015, kaba la treikam mynta haka shnong Umjalasiaw, Wahiajer, Niriang bad kyrmen yn sa pynïar shuh shuh sha kiwei de ki shnong.
Na ka liang u kongsan ha kane ka sngi ula sam ruh ïa ki kor lur sha ki nongrep bad plie ïaka Exhibition Stalls bala pynlong ha phyllaw jong katei ka ophis ka KVK Jaiñtia Hills.
Ha kane ka sngi la donlang da u Dr. A.K Mohanty, Director ICAR-ATARI, ka Dr. G. Pratibha PI, TDC-NICRA, ICAR-CRIDA, Hyderabad, kiwei de ki ophisar na ki tnad treikam ka rep ka riang, ki nongïalam shnong bad ki nongrep ka thaiñ kiba la wan sha kane ka prokram.
U ma Sniawbhalang Dhar haba ai jingkren ha kane ka sngi ula khot ïa ki nongrep ba kin pylleit jingmut ha ka kam rep, kaba long ka bynta ba kongsan tam jong ka jingim ban pyndap bam ïa ka Ri hi baroh kawei namar khlem ki nongrep kam myntoi satia ïa ki nongbam.
Ula ong ka jingdon kane ka ophis treikam kan ïarap ïa ki nongrep ban ïoh jingtip shaphang ka rep ka riang katkum ka por ba dei ban rep da kaba pyndonkam ïa ki jingstad bala ïoh na ki Scientist, ula kyntu kum ki nongrep kidei ban kheiñ kor ïa kane ka kam kaba bas ïa ka ïing ka sem jong ki.
Shuh shuh ula pynsngew na ka liang ka sorkar jylla ruh kala wanrah ïa ki skim bapher bapher haka subsidy kaba rit sha ki nongrep naduh ka Yes Meghalaya, Hello Meghalaya, FOCUS Hub, ka PRIME Hub, ka CM Connect nalor kiwei de ban kyntiew ïa ka rep ka riang ha ka jylla baroh kawei.
