Plie u CEM ïa ka District Council Court ha Ri-Bhoi ban pynsuk bad pynjan ïa ka jingbishar sha ki paidbah

Nongpoh, Jymmang 31: Ban nang pynjan ïaki paidbah ha kaba ïadei bad ki kam mukotduma ha kashari jong ka District Council, bad ban pynsuk ïaki paidbah haka leit ka wan ban leh ïaki kot ki sla naduh ki Birth Certificate, ka District Council mynta ka sngi kala shim ïa ka sienjam ban plie ïaka District Council Court, ha ophis jong ka KHADC ha Nongpoh, Ri-Bhoi District.
Ïa katei ka District Council Court, Nongpoh Branch la wan ban plie pyrda da u Bah TW Chyne CEM ka KHADC kum u kongsan, Bah Lamphrang Blah Chairman ka District Council, Bah Teibor Pathaw EM Council Building, Kong Grace Mary Kharpuri EM Market, Jambor War EM Elaka, Bah Victor Rani EM Arts and Culture, Bah Balajied Ranee MDC ka Nongpoh, u Bah S Kharsyiemlieh Judge jong ka District Council bad kiwei kiwei ki riew rangbah naduh ki nongïalam shnong ka thaiñ Nongpoh.
Haba kren maitphang ha katei ka sngi halor ka jingtreikam jong ka District Council Courts u Bah S Kharsyiemlieh u ba dei u Judge jong ka District Council u la pynpaw ba naduh ba u la shimti ïaka kam u la don ka jingpyrkhat ban pynjan ïaka jingbishar sha ki paidbah, dei tad haduh kane ka EC kaba mynta haka jingïalam u Bah TW Chyne katei ka jingangnud kala urlong, namar naduh ki thaiñ khappud jong ka Ri-Bhoi kiba jngai ka leit ka wan ki hap ban wan shaduh nongbah Shillong haba don ki jingkajia bad ki mukotduma.
Ka jingthmu jong katei ka District Court ha Nongpoh ka long ban pynjan ïaki paidbah jong ka dong Ri-Bhoi baroh ba kim donkam shuh ban leit sha Shiilong namar kino kino ki jingeh ba ki ïakynduh bad ki jingmudui jong ki, ki lah ban ujor sha katei ka Kashari kaba don ha Nongpoh ban ai ïaka jingshishar bad kane kala long shisha u mawjam ban wanrah ka jingbishar kham jan sha ki paidbah bad ki jingujor ki kynthup naduh ki kam kajia jaka puta hapdeng ki para khasi, ka jingkajia shi lok ha kaba u lok u la phet noh bad ki khun ki donkam ïaka bai bam kane ka court kala lah ban ai ka jingbishar bad kiwei kiwei kiba kynthup ruh wat ki kam sniew.
Naka liang u Bah TW Chyne kum u kongsan haba kren ha katei ka sngi u la pynpaw ka jingsngewkmen kaba khraw hadien ba la ioh ban plie paidbah ïa katei ka District Council Courts kaba dei u mawjam ba khraw ïaka District Council, watla ka jingtreikam jongkatei ka court kala ïaid kumba katto katne por hynrei mynta ka sngi la ioh ban plie paidbah syndon ïaka.
U la ong ruh ba katei ka Court kan pynjan bad pynsuk ïaki paidbah ban bishar bad mudui ïaki mukotduma, bad katkum ka Administration of Justice ka long ba hapoh u pud u sam jong ka Schedule Area ngi don ïaki ïing bishar ym dei tang ki District Court hynrei u la pynkynmaw ruh ba ka bishar ha u khasi ka dei naduh ki Dorbar Shnong bad kala dei ka por ïaki shnong ban pynthymmai bad pykhie im ïaki Village Court, nangta ngi don ruh ïaki Additional Sub-Ordinate Court lyngba ki khlieh nongsynshar jong ngi kiba long kum ki nongbishar ha kine ki court bad kaba lai ngi don ïaki District Court ba ngi don ïaki Judge bad ki Magistrate.
U la pynkynmaw ruh ba haka snem bala dep kala don ka jingkhih win ha kaba naka liang ka sorkar kala pynmih ïaka hukum ban pyntreikam noh ïaka CrPC haka jylla baroh kawei, kaei ka jingsngew jong ngi ha kato ka por ka long ba lyngba kane ka hukum ki District Council Courts kin duh bor noh, hynrei hadien ka jingïakynduh bad ka sorkar bad kumjuh ïa u Myntri Rangbah la pynsngewthuh ba katei ka hukum kan nym kjtah ïaki bor jong ki court jong ka District Council.
“Nga ngeit skhem ruh ba ka jingdon jong kane ka court ha Nongpoh kan ai ka jingshakri ïaki paidbah ha kaba ïadei bad ki mukotduma para riewlum, ki Birth Certificate bad kyrpad ruh ïaka tnad Pulit ba ka jingbishar ha kaba ïadei bad ki mukotduma para riewlum kiba dei para khasi ba kin phah beit shaka court jong ka District Council kiba la biang ruh ki nongbishar bad nga ngeit ruh ba ka jingdon jong kane ka court kan long ruh kum ka lad aikam aijam ïaki samla kiba la pyndep ïaki jingpule ha kaba ïadei bad ka aiñ” la ong u Bah Chyne da kaba bynrap ruh ba naka liang ka Council kan nym shong kli kli bad ban nym ailad ba ïa kane ka bor jong ka District Council kan duh noh hynrei ba ngin dang pynkhlaiñ na kawei ka por sha kawei ka por, u la bynrap.