Nongstoiñ, Lber 18: Ka Dorbar shnong Nongsohpian ha ka sngi nyngkong, ka la ïoh ban plie paidbah ïa ka ïing Dorbar shnong, kaba la tei lyngba ka skhim Rashtriya Gram Swaraj Abhiyan (RGSA) lyngba ka ophis jong u BDO ka Nongstoiñ C&RD Block ha ka mang tyngka kaba 20 lak tyngka.
Ïa kane ka ïing Dorbar la plie paidbah ruh da u bah C.P Mawkon ADC ha ryngkat ka jingïadonlang u bah Lakador Syiem Commandant ka 4th MLP Batllaion, u bah T. Diengngan BDO ka Nongstoiñ C&RD Block, ki ophisar na ki tnad sorkar bapher bapher ki riew rangbah bad ki paidbah nongshong shnong.
U Kongsan haba ai jingkren ha kane ka jingïalang plie ïa ka ïing Dorbar u la kyntu ïa ki paidbah nongshong shnong, ba kin sumar ïa ka khnang ba kan long ka jingmyntoi ïa ka shnong ka thaw bad ïa ki paidbah hi baroh.
Ha kane ka juh ka sngi, u bah C.P Mawkon ADC ka WKHD u la plie paidbah ruh ïa ar tylli ki ïing PMAYG, ki ïing na ka bynta kiba duna ka ïoh ka kot hapoh ka shnong Nongsohpian, West Khasi Hills District.
Ha kane ka sngi la sakhi da ka jingïadon ryngkatlang ruh u bah Lakador Syiem Commandant ka 4th MLP Battalion kum u symbud kongsan u ba long ruh uwei na ki ophisar u ba ju noh synñiang shibun ki kam kiba bha na ka bynta katei ka shnong, u Sordar ka shnong Nongsohpian u Babu Sirian Wahlang, ki riew rangbah bad kiwei kiwei.
Na ka liang jong u ADC ryngkat u Commandant ka 4th Battalion ki la ai jingïaroh ïa ki nongïalam shnong ha ryngkat kitei ki ar tylli ki longïing, kiba la lah ban pyntrei bha bad trei hok ïa ka skhim kaba ka sorkar ka la ai bad ïarap.
