Ka M/S NES ka jaka theh umphniang kali ba paw ha ki jylla shatei lam mihngi ka ri India

Nongpoh, Lber 18: Ka M/S NES Jorobat kawei na ka jaka theh umphniang kali jong ka Bharat Petroleum Corporation Limited (BPCL) kaba la paw bha ha ka jylla shatei lam mihngi ka ri india, ha ka Sngi u Blei ka la rakhe ïa ka jingïaid lynti ba 18 snem jong ka jingshakri na ka bynta ban pynbiang ïa ki Umphniang kali sha ki paidbah ha Meghalaya-Assam bad ha ki jylla ka thaiñ shatei Lam Mihngi ka ri India.
U Myntri sorkar ka jylla, ba dei peit ïa ka tnad Animal Husbandry and Veterinary, u Bah A.L Hek u la wan ban shim bynta kum u kongsam ha kane ka jingrakhe ïa ka jingïaid lynti ba 18 snem katei ka petrol pump bad ruh la shim bynta ruh ban plie ïa ka petrol pump ba la pynkha tnad da katei ka M/S NES Jorobat na ka bynta ban ai shuh shuh ka jingshakri ban pynbiang umphnaing ïa ki kali riit kum ki SUV, Car bad Sdan la ka long petrol ne diesel.
La pynphuh pynphieng ruh ha ka sngi da ka jingdon lang u Jubin Garg u nongwai ba paw ka ri bad kynthup ruh ki jingshad tynrai na ki samla Assamese ba la pynhun ia ki paidbah ba sakhi ha kane ka sngi kyrpang.
Haba kren ha kane ka sngi kum u kongsan, u Bah A.L Hek myntri sorkar ka Meghalaya u la pynpaw ka jingkmen ba ka M/S NES Jorobat ka la ai ka jingshakri kaba 18 snem sha ki paidbah bad kawei kaba u la ai jingïaroh ka dei ka jingaikam ai jam ïa ki samla lyngba ka jingdon jong kane ka petrol pump ha ka jylla.
U B J Phukan, MD ka NRL, u la ai jingaroh ïa ka BPCL ba ka don bynta bad ka M/S NES Jorobat kaba la ioh ïa ka nam kum ka petrol pump kaba heh tam bad kaba lah bha ban die ïa ki umphniang ban pynbiang ïa ki jingdonkam jong ki paidbah bad ruh ba ka kyrdan jong kane ka petrol pump ka la long kaba bit ba biang pura kumba angnud ki paidbah.
U Debashis Naik, uba dei u Head Retail East BPCL, u la kren halor ka jingdonkam ban dang pynsuk ïa ki paidbah khamtam ka jingwanrah ïa ka EV Charging bad ka jingwan rah ruh ïaka Double Dhamaka Scheme ban ai jingmyntoi shuh shuh ïa ki paidbah.
Ha kane ka sngi nalor ki paidbah bad ki nongïalam shnong la wan ruh ban sakhi da ka jingdon lang ki heh ka BPCL ba kynthup ïa u Pankaj Das, State Head North East, u Mowsam Khaund, Assam Territory Manager, u Faiyaz Alam, State Engineering Officer, u Janmjeet Das, Shillong Territory Manager, u Pankaj Doley, Shillong Engineering Officer bad kiwei kiwei.
Shuh shih kumba la pynpaw, ka jingrakhe ka M/S NES ïa ka jingïaid lynti ba 18 snem bad ruh ba plie thymmai ruh ïa ka jaka theh umphniang ka dei ka jingangnud ka M/S NES ban dang ai shuh shuh ka jingshakri kaba paka tam sha ki paidbah ha kaba ïa dei bad ka jingpynbiang ïa ki umphniang kali sha ki paidbah bad kiwei kiwei ki jingshakri na ka bynta u paidbah.