Rakhe ka Little Angels Secondary School, ïaka jingdap 25 snem ka jingshakri jingnang jingstad
Jowai, Lber 18: Ka Little Angels Secondary School Moosalangkat Jowai, West Jaiñtia Hills District mynta ka sngi 18 tarik u Lber, 2024 kala sdang ban rakhe ïa ka jingdap 25 snem ka jingshakri haka liang ka jingai jingnang jingstad ïa ki khynnah skul hapoh ka District hi baroh kawei.
Ïa kane ka skul la seng naduh ka snem 1999 bad ka motto kaba ong “Stepping Stones to Success”, haka por ba sdang ki don tang kumba 7 ngut ki khynnah skul bad ar ngut ki nonghikai, katba ki snem ki nang ïaid ka skul kala ïoh ban pynïasoh bad ka Meghalaya Board Of School Education (MBOSE).
Ym tang haka jingpule kaba ki khynnah kila ïoh hynrei wat ha ki kam Sports ka skul kala lah ban pynmih shibun khynnah ïalehkai kiba don ïa ki sap kyrpang bapher bapher, ka skul ka don ïa ka thong na ka bynta ban ai jinghikai ïa ki khynnah pule katkum ka jingkylla jong ka juk ba mynta.
Ïa kane ka jingsdang rakhe dap 25 snem jong ka skul la wan ban plie pyrda da u kongsan uba dei ruh u Deputy Commissioner ka West Jaiñtia Hills u bah B.S. Sohliya (IAS), haka jingdonlang ka School Education Officer West Jaiñtia Hills kong A. Syiem kum ka symbud kongsan, ka kong Wanbok Sayoo Headmistress, ki nonghikai, ki kmie ki kpa jong ki khynnah skul nalor kiwei de kiba la shah khot sngewbha.
Na ka liang u bah Sohliya haka jingkren ula ai mynsiem ïa kane skul ban kan dang ïaibteng ka jingai jingnang jingstad ïa ki khynnah skul jong ka District bad ha kajuh ka por kan long ruh kum ka nuksa ïa kiwei de ki skul. U bah Sohliya ula ong kum ka Ri synshar paidbah ka donkam ïa ki paidbah nongshong shnong bad pyndep ïala ka jong ka hok ban thep vote na ka bynta ka election ban wan.
Ha kane ka sngi la plie kumjuh ïa ka Library bad Digital Classroom kaba la pynheh khnang na ka bynta ki khynnah skul bad la jingot ïa u cake jong ka jingrakhe kaba shi snem lynter. La sam kumjuh ïa ki khusnam sha ka nonghikai ba nyngkong jong ka skul, ïa ki 7 ngut ki khynnah skul bad i wei kiba la pass ïaka Matriculation exam (Batch 2012), ïa kiba pass ha u snem 2023 jong ka SSLC bad ïa kiwei kiwei de.
La pynsngong shit shuh shuh ïa kane ka sngi daki jingrwai bad ki jingshad bapher bapaher ba la shim bynta da ki khynnah pule jong kane ka skul. La ïoh ïa ki kyntien ai khublei na ka Rimanda Suchiang bad la pynkut ïa kane ka prokram da ka jingduwai na u Rev. G.C. Lynden.