Lum jingïalang u Deputy Commissioner (EL) ïa ki ophisar bad ki Political Parties ha Mawkyrwat

Mawkyrwat, Lber 18: U bah T. Lyngwa, IAS, Deputy Commissioner (EL) jong ka South West Khasi Hills District, Mawkyrwat mynta ka sngi u la lum ïa ka jingïalang ryngkat bad ki Political Parties hapoh ka DRDA Hall, South West Khasi Hills District, Mawkyrwat ha kaba ïa dei bad ka jingpynkhreh ïa ka General Election 2024 sha ka Lok Sabha ka ban long ha ka 19 tarik u Ïaïong, 2024.
Ha ka jingïadonlang u bah L.T. Tariang, MCS, Additional Deputy Commissioner (EL) jong ka South West Khasi Hills District, Mawkyrwat, ka kong Y.R. Mawlong, MCS, Additional Deputy Commissioner jong ka South West Khasi Hills District, Mawkyrwat, u bah K. Nongsteng, MCS, Assistant Commissioner, AC/BDO, Ranikor C&RD Block bad kiwei kiwei ki ophisar.
U bah T. Lyngwa, IAS u la ong ba hadien ba la pynbna ïa ka tarik ban jied ïa ki nongmihkhmat jong ka Lok Sabha Election 2024 la pyntreikam ïa ka kyndon hapoh ka kyndon aiñ 144 CrPC ha kaba la mana ïa ka jingpyndonkam ne kit ïa ki tiar siat bad suloi bad kane ka aiñ kan ym treikam ïa ki Police Home Guards, Forest Personnel, Border Security Force bad Central Reserve Police Force.
Ha kajuh ka por la bthah wat ïa kito kiba don license ban wanrah noh shwa ïa kitei ki tiar siat ha ki Police Station kiba don hajan hapoh 14 sngi ba la pynmih ïa kane ka hukum.
Shuh shuh u la pynkynmaw ruh ba ki Political Parties ki dei ban bud beit bud ryntih ïa ka Model Code of Conduct ne MCC bad kiwei kiwei ki jingbthah jong ka Election Commission na ka bynta ka jingïaid beit ïaid ryntih ha ka election.
La ïoh ruh ka jingbatai halor ka jingpyndonkam ïa ka Suvidha App bad kiwei kiwei kiba ïadei bad kane ka Lok Sabha Election 2024.