Khliehriat jymmang 03 : Ka lympung ïalehkai Sports jong ki khynnah skul ba la tip kum ka “Chief Minister District Level Inter School Athletic Meet 2023,” ka East Jaiñtia Hills District, kala sdang hynne ka sngi Balang ha kaba u Deputy Commissioner ka East Jaiñtia Hills District u Abhilash Barnawal, IAS, u la wan ban plie bad pynher ïa ka lama jong kane ka lympung kaba la pynïaid da ka ophis jong ka District Sports Officer EJHD ryngkat ka jingïatreilang bad ka East Jaiñtia District Sports Association (EJDSA).
ïa kane ka lympung ïalehkai la pynlong ha madan Teilang Playground Dkhiah, bad ha kane ka lympung la wan ban ïashim bynta haduh 30 tylli ki skul bapher bapher napoh East Jaiñtia Hills District.
Ha kane ka sngi la ïa don lang ruh ka DSO ka EJHD Kong S. M. Rapsang, ki nongkitkam ka EJDSA kumjuh ruh na ka WJDSA bad kiwei kiwei. Kane ka lympung ïalehkai kan long lai sngi kynthih.
Ha kane ka jingïalehkai la don ki jingïakop kiba kynthup ïa ka jingmareh 100, 200,400, 600, 800 bad1500 Mitar, Long Jump, High Jump, Shot Put, Discuss throw, Javelin Throw bad Medley race.
Ha kane lympung la bynta ruh ïa ki khynnah ha ki lai kyrdan kita Under-14, Under-16 bad Under-18 na ka bynta ki khynnah shynrang bad kynthei.
Hashwa ban pynher ïa ka lama u DC Abhilash, u la ai khublei ïa ka ophis ka DSO, ïa ki nongkitkam ka EJDSA kiba lah ban pynïaid ïa kane ka jingïalehkai sports kaba la wan ïashim da haduh 30 tylli ki skul kaba dei ruh u snem ba bun duh ki skul ki ba wan ban ïashim bynta haba ïanujor bad kiwei pat ki snem kiba la leit. Na ka liang jong u, u la kitbok kitrwiang ruh ïa baroh ki khynnah skul kiba la wan ban ïashim bynta ha kane ka lympung ïalehkai.
