Shillong, Nohprah 15 : Ki nongshong shnong ka Wahlkhiat ha ka sngi Thohdieng ki la ïoh pdiang da ka jaka pynlang um kaba la shna bha lyngba ka skim kyrpang ba la pynïoh da u Myntri Rangbah ka Jylla ba tip kum ka Chief Minister Special Development Fund kaba 10lak tam.
ïa kane ka jaka pynlang um ba tip kum ka Umsyiem, katei ka shnong ka la ïoh lyngba ka jingtrei borbah jong u Bah Kansing Lyngshiang, kyrtong ka NPP na Mawkynrew ha ka elekshon ba la dep, ryngkat ka jingtreilang bad ki bor shnong.
Kiba bun ki nongkren kynthup naduh i Kong E Khongjong, H Tyngsong, S Ryndong kumjuh u Rangbah Shnong Bah Rishot Kshiar ki la pynpaw ka jingsngewnguh ïa u Bah Kansing uba la lah ban pynïoh ïa katei ka skim kyrpang na u Myntri Rangbah ka Jylla.
Ki la ong ruh ba ha shwa ban ïoh ïa katei ka skim ki hap ban ïeng laiñ ban ïoh um namar don tang kawei ka kor kaba tan na ka shyngiar hynrei lyngba katei ka skim nalor ba ki ïoh ban shna ïa ka jaka pynlang um la shna kham bun ruh ki jaka pyllait um khnang ba ki paidbah kin ym donkam shuh ban ïeng laiñ ban ïoh um.
Na ka liang u Bah Kansing pat haba kren kum u Kongsan u la ïathuh ba wat hadien ba u la shah rem ha ka elekshon ba la dep hynrei ka mynsiem ïarap ïa la ka thaiñ kam pat duh bad dei na kata ka daw tang ha kine ki khyndiat por u la ïoh ban plie paidbah haduh lai tylli ki projek ba u pynïoh na ka skim kyrpang u Myntri Rangbah.
Ha kajuh ka por u ong ruh ba na ka bynta kiwei katei ka projek ka long kaba dang rit hynrei na ka bynta kiba donkam hok pat ka la dei ka jingkyrkhu kaba khraw.
