La plie ïa ka ‘Center’ ban peit shipor ïa ki riew tymmen ba pynïaid da ka MCSWA ha Salaroh Jowai
Jowai, Nohprah 15: Ka Mih-Myntdu Community Social Welfare Association (MCSWA) kawei na ki kynhun treimon sngewbha mynta ka sngi kala plie paidbah ïaka jaka ban peit shipor ïaki riew tymmmen ne ka ‘Drop in Centre for Senior Citizen’ kaba don ha MCSWA Head Office, Faith Academy Campus, Moosalangkat, Salaroh Road, Jowai.
Ha kane Centre ban peit shipor ïaki riew tymmen yn pdiang ïa ki naduh ka por 10 baje mynstep haduh 4 baje shiteng janmiet, ha kaba ki riew tymmen ki lah ban wan shong shipor ban ïoh lad ban ïaphylliew jingmut lang para maki, kin don ruh ki lad ban pynkmen ïa ki naduh ki rukom dro dur, ki jingrwai, ki jait jingïalehkai, ka rukom ai jingsumar ïaka khoit ka khiah nalor kiwei kiwei de.
Mynta ka sngi la wan ban plie pyrda ïaka da ka kongsan ka kong D.V Lyngdoh, MCS Additional Deputy Commissioner WJHD, ha ryngkat ka jingdonlang ka Director MCSWA Dr. J.N. Shullai, ka kong Ripaia Passah, District Social Welfare Officer kaba la batai ruh shaphang ki skim ha kaba ïadei bad kine ki jaka ba peit ïa ki riew tymmen, ki nongtrei ka MCSWA, ki riew tymmen bad kiwei de.
La ïathuh ïa kane ka Centre yn ïarap lyngba ka jingkyrshan jong ka ophis District Social Welfare, West Jaiñtia Hills ha ryngkat ka jingtreilang bad ka Mih-Myntdu Community Social Welfare Association (MCSWA) naka bynta ka jingmyntoi jong ki riew tymmen.
Na ka liang ka kongsan kong D.V Lyngdoh haba ai jingkren kala kyntu ïa kane ka Association ba kin trei shitom ban pynbha shuh shuh ïaka rukom treikam jong kane ka Centre ha kine ki sngi ban wan, lyngba kane ka center kan ïarap ban khring shuh shuh ïa ki riew tymmen ban wan shong shipor ha kane ka Center.
Kala ong kum ki Khasi Pnar ‘ngi dei ban burom bad ban pynneh pynsah ïa ka Riti ka Dustur jong ki longshwa manshwa ïa kaei kaba ki riew tynnen ki ïathuh khana haki por hyndai hynthai’.
Ha ka juh ka por ka kyrmen skhem lyngba ka jingdon kum kane ka Centre kan ïarap ïa ki riew tymmen ban pynjahthaid ïa ki jingmut jingpyrkhat, ban pyllait na jingsngew marwei, ka jingsngewsih bad ki jingpang ba bun jait.