Mar ïa ïoh jingmynjur na ki trai jaka, yn sdang pyntrei biang ïa ka surok Photjaud-Nongnam: Renikton

Mawkyrwat, Nohprah 15: U bah Renikton Lyngdoh Tongkhar u nongmihkhmat jong ka Mawkyrwat Constituency ha ka 13 tarik u Nohprah, 2023 ula hiar jurip ïa ka surok Pradhan Mantri Gram Sadak Yojana (PMGSY) kaba jngai kumba 19.303 km na Photjaud sha Mawkhyrwang – Nongnam, South West Khasi Hills District.
Haba kren ha ki lad pathai khubor, u bah Renikton Lyngdoh Tongkhar u la ong ba kane ka jinghiar jurip jong u ïa kane ka surok, ka dei hadien ka jingsangeh noh jong u kontraktor ban pyntrei ïa kane ka surok na Mawrap – Nongnam la kham katto katne por. U la pynpaw ruh ba halor kane ka bynta, u bah Renikton u la ïoh ka lad ban ïa kynduh ïa u Myntri ba dei peit ïa ka tnad PWD (Roads) ryngkat ki jingkyrpad ba u dei ban leh ei ei halor kane ka surok. Ym tang kata, kumjuh ruh ïa ka department ba ka dei ban shimkhia da kaba khot tender biang ha kaba ïa dei bad ka jingpyntrei khnang ba ki paidbah jong ki san ne hynriew tylli ki shnong kin ïoh noh ïa kaei kaba ki ki la angnud la slem bah.
Namarkata, u bah Renikton u don ka jingkyrmen ba, “Mar ïa ïoh ïa ki jingthoh ba na ka liang jong ki trai jaka ki ai kylluit mynsiem ban shna ïa kata ka surok ka ban ïaid mynta ka Mawrap sha Nongnam, na ka liang ka department ruh kam dei shuh ban pynsahteng hynrei ka dei ban leh noh ïa kaba donkam khnang ba kam kan long kaba ïaid beit ïaid ryntih”, u la ong.
Shuh shuh u bah Renikton u la ong ba ha kane ka jingjurip, u la lap ba ka jingpyntrei ïa kane ka surok mynta la i kumba ka la long kumba 60% ei ei, hynrei ym tip pat balei u nongpyntrei u ieh shiteng. Kumta u la kular ban shimkhia halor kane ka surok, namar ka surok ka long kaba donkam haduh katta katta khamtam eh ba na ki shnong kiba kham hapoh ki mar rep ruh ki long kiba bun.
Ha kane ka sngi la synran lang da ki riew rangbah jong ka shnong bad kiwei de.