Kyntu u Bah Ronnie ïa ka Sorkar ban leh eiei lada don ba pynwit ïa ka jingshna surok Shillong-Dawki

Shillong, Nohprah, 15: U Nongïalam jong ka Liang Pyrshah u Bah Ronnie V. Lyngdoh ha ka sngi Palei u la kyntu ïa ka Sorkar Jylla ba kan pynthikna ba kino kino ki riewshim kabu kim dei ban pynwit ïa ka jingpyntrei ïa ka surok Shillong-Dawki kaba kynthup ïa ka jingshna ïa ka surok four-lane na Umshyrpi shaduh 7 Mer, Upper Shillong.
Kane ka jingkren jong u Bah Ronnie ka long hadien ba ka Iingbishar Meghalaya High Court ka la bthah ba kam dei ban don kano kano ka jingpynthud na ki kynhun seng khnang ba ka jingshna ïa ka surok Shillong-Dawki kan long kaba ïaid beit.
Ha ka jingïakren bad ki lad pathai khubor, u Bah Ronnie, uba long ruh u MLA jong ka Seng Congress na Mylliem u la ong ba ka long kaba sngewsih ba ki katto katne ngut ki briew ki shim kabu ban pynthud ïa ka jingmyntoi jong ki paidbah.
“Nga la ïakren bad ka National Highways and Infrastructure Development Corporation Limited (NHIDCL) lada don kum kine ki jingjia kin pyntip mardor sha nga khnang ba ngin dup lah ban pynthikna ba kin ym don kino kino ki jingpynwit ha kaba pyntrei ïa ka kam,” u la ong bad bynrap, “nga ngeit ba ki bor ba dei peit kin shimkhia naduh ki bor jong ka aiñ bad ba ka Sorkar ruh kan pynthikna ba ki paidbah kin ym mad ïa ka suhsat tang na ka daw ka jingshim kabu jong ki katto katne ki kynhun.”
U Bah Ronnei u la ong ba u Symbud Myntri Rangbah uba peit ïa ka tnat PWD (Roads) Bah Prestone Tynsong u la pyntip ba ka jingslem ban sdang ïa ka jingtrei ka dei namarba ka kompeni kaba la ïoh ban pyntrei, ka la iehnoh ïa ka kam bad la hap ban khot Tender biang ban pyntrei ïa kane ka projek.
“Ka jingkhot tender ka ladep bad ïa ka kam ruh ladep aiti bad mynta nga la ïohi ba ka kam ka la sdang biang,” u la ong.
Da kaba kyntu ïa ka Sorkar ba kan pynthikna ba ka kam kan long kaba stet, u Bah Ronnie u la ong, “nga kyrpad ïa ka Sorkar ba kan buddien bad u kontraktor uba pyntrei bad ïa ka NHIDCL ba kin pynthikna ba ka kam ka dei ban ïaid noh shaid shaid shakhmat namarba ngi la mad jingeh shikatdei eh.”
U la ong ba kane ka projek kan weng shikatdei eh ïa ka jingsuhsat jong ki paidbah kiba ju pyndonkam manla ka sngi ïa ka surok na Umshyrpi sha 7Mer.
“Ïa mynta, phi ïohi hi ban ïaid na Shillong sha Upper Shillong sha kino kino ki shnong jong kane ka thaiñ, ka la pynsuhsat haduh katta katta namarba ngi sahkut ha surok da ki kynta. Ym tang ha Upper Shillong ne Mylliem hynrei ka ktah lut ïa baroh ki shnong, ki thaiñ kiba ju pyndonkam ïa kane ka surok,” u la ong.