Phuh phieng ka leh niam ka Nohsakyriat bad ka Raij Ialong

0

Jowai, Ïaïong 28: Ka Raij Ialong hadien ba ka la pyndep ïa ka Kñia Thoh Ryngkaw bad ïa ka Kñia Syiem Duwan dangstep phyrngap hynne ka sngi 28 tarik ha Lawkyntang kaba don hajan Ialong Park bad ka Kñia Syiem Duwan ha mynshem ïing u Lyngdoh Starly Lyngdoh Phawa bad ha ka por nohphai sngi pat ki khun ka Raij kila pynlong ïa ka Noh Sakyriat ha madan Ryngkaw.
“Ka Thoh Ryngkaw ka dei ka jingleh ñiam bad ka kñia ka khriam ha u Leiryngkaw uba long u nongda nongker jong ka Raij ka Muluk bad u nongda nongker ïa baroh ki nongshong shnong jong ka Raij Ialong na kino kino ki jingsniew bad ki jingpang jingshitom kiba wan na shatei shathie bad na mihngi na sepngi.
Katba ka Kñia Syiem Duwan pat ka dei ka jingkñia ïa ka Syiem Duwan kaba long ka Lei ïing Lei Sem, la ong ba ha baroh kine ki jinglehñiam ki long kiba bha ba miat bad kiba la pdiang hun na U Blei ne ki Blei. Ha baroh kine ki jinglehñiam la ïa donlang da ki Khyndai Waheh jong ka Raij.
Ha ka por kumba 2 baje nohphai sngi la pynlong ïa ka jinglehkmen da ka ‘Noh Sakyriat’, ha kaba u ma Ngaitlang Dhar MLA barim ka Umroi uba long ruh u khun u kti jong ka Raij Ialong u long u kongsan.
U ma Ngaitlang Dhar haba kren ha kane ka sngi u pynpaw ïa ka jingkmen kaba khraw haba ula ïoh kane ka lad ban ïa kmen lang ha kane ka Noh Sakyriat kum u khun u kti jong ka Raij Ialong. U ma Ngaitlang ha ka sneng ka khraw jong u kum u kongsan, u kyntu ïa ki khun samla jong ka Raij Shynrang bad Kynthei ba kin ïashim khia ha kum kine ki jingshad jingkmen bad ha ka ñiam ka rukom.
Nangta u kyntu ïa ki khun samla ban mih shakhmat bad ban pynneh pynsah ïa ka Riti ka Dustur bad ïa ka ñiam ka rukom kaba la buh la seng da ki longshwa manshwa.
Shuh shuh u ma Ngaitlang Dhar u pynkut ïa ka jingkren da kaba kyntu bad pynshlur ïa ki khun samla ha ka ñiam ka rukom ha ka riti ka dustur, ha ka juh ka por u ong ba ym bit ban beiñ ban kynnoh ïa kiwei kiwei ki ñiam.
Ha kane ka sngi la ïoh ruh ïa ka jingkren na u ma Mario Biam Secretary ka Seinkhihlang, na u ma Juhhi Pale General Secretary ka Seiñ Raij Ialong, na ka Sanki Phawa (Khynnah SHT), ïa ka jingkren ai khublei la ïoh da ka Mangahi Dhar, katba ïa ka jingïalang la pynïaid da u ma Pyrkhat Shylla, President ka Seiñ Raij Ialong.
Ha kane ka sngi la don ruh ka jingpynkup burom da ka Seiñ Raij Ialong ïa ki ar ngut ki riew tymmen kata ïa u ma Jem Dhar bad ïa u ma Je Shylla.

Leave A Reply

Your email address will not be published.