Dawa ka JSM ban pynbiang bha ïa ki jingdokam ha ka jaka sumar ha PHC Pamrapaithlu

0

Khliehriat ïaïong 28 : Ki nongïalam jong ka Jaiñtia Students Movement Pamra Unit bad jong ka Wapung Unit, hynnin ka sngi ki la leit ban jurip ïa ka jaka sumar, ka PHC ha Pamrapaithlu, kane ka jingleit jurip ka dei namar ka seng ka ïoh ïa ki jingunjor na ki paidbah halor ka jingbym biang bha katei ka PHC, na ka liang ka seng ka dawa na ka sorkar bad ki bor ba dei peit ba ki dei ban pynbit pynbiang bha ïa ki jingdonkam ha katei ka PHC kaban long na ka bynta ka jingbit jingbiang ki paidbah ka thaiñ kiba hap hapoh kane ka PHC.
Ïa kane ka jingleit jurip la lam khmat da u President JSM Wapung Unit, u samla Kerbhami Dkhar bad u Vice President, u samla Ionis Rymbai, ki la ïoh ruh ban ïakynduh bad ka doctor kaba peit ïa katei ka PHC bad ki la aiti ruh ïa ka dorkhas ha ka doctor.
La ong ruh ba katkum ka jingujor jong ki paidbah, ki la ong ba ki nongtrei jong katei ka PHC ruh ki long kiba bym ju wan biang por bad kane ka ju buh jingeh ïa kito kiba wan shim dawai bad kumjuh ruh kito kiba wan donkam ha kaba ïadei bad ka jingdonkam ki paidbah ïa ki kot ki sla bad ki syrnot sngi kha na katei ka PHC.
Ka seng ka pynpaw ruh ka jingsngew khia haba ki tip bad ïoh ujor ba ki nongtrei jong katei ka PHC ha ka jaka ba kin ai ka jingïarap, hynrei ki ju kren da ki ktien ba khor ïa ki paidbah kiba wan shim dawai bad kiba wan donkam.
Ha ka jingïakren kitei ki nongïalam ka JSM bad ka Doctor jong katei ka PHC ha Pamrapithlu, ka doctor ka la pynsgew ïa ki jingduna kiba dang bun ha katei ka PHC, ha kaba ka kali kit nongpang (ambulance) ruh ka la rim bad ka la i donkam ban don noh da ka wei pat ka kali kit nongpang kaba thymmai khnang ba kane ka PHC kan dup lah ban ai shuh shuh ka jingshakri kaba paka ïa ki paidbah.
Na ka ling ka seng ka ïohi ruh ba kane ka PHC ka donkam ban don ruh ïa ka Emergency Room na ka bynta kiba pang ba shitom kiba wan sumar ha katei ka PHC, kumjuh ruh ki kamra ban thiah kiba pang ba shitom kiba wan na ki shnong bapher bapher, namar ki don haduh arphew tylli ki shnong kiba hap hapoh kane ka jaka sumar (PHC), na ka liang ka seng ka dawa na ka sorkar ba kan sngewbha ban phai khmat lem sha kane ka PHC ban pynbit pynbiang lem ïa ki jingdonkam.

Leave A Reply

Your email address will not be published.