Phla ba ki hap ban siew 4 hajar ban lait na khyrdop talasi, kyntait mardor ki pulit Infiltration ba shim pisa

Nongpoh, Lber 13: Ka Khasi Student Union, Umsning Circle hynnin ka sngi kala ioh ban bat haduh 90 ngut ki bar jylla kiba la rung beaiñ sha ka jylla khlem ki kot ki sla kiba biang bad pynkheiñ ruh ïaka Inter State Migrants Workmen (Regulation of Employment and Conditions of Service) Act 2011, naki 2 tylli ki Bus, katba ki dang thmu ban leit trei bylla sha Jaiñtia Hills.
Ka jingiohbat jong ka KSU Umsning Circle ïa ki tei ki bar jylla ka dei hadien ka jing ipher ïa ka rukom wan ka jong ki haduh 2 bus kiba don ïa u number kali AS 01 GC 7338 bad AS 01 KC 5638 bad ïa kitei ki bar jylla la bat noh ha ki thaiñ Umsning bad hadien ka jingtohkit jong ka seng la lap ba kitei ki bar jylla kim don ïaki kot ki sla kiba biang.
Ka KSU kum ba ka la ju phah ka kyrwoh ïa ka sorkar jylla bad ka sorkar pdeng ba kin pynkhlaiñ ïa ki aiñ ban pyrkhing ïa ki bar jylla, hynrei kaba lyngngoh ba wat hapoh Infiltration Check Gate ki nongtrei kim da pyrkhing hynrei ki tei ki bar jylla ki la ïathuh ban ba ki siew tang 4000 tyngka bad ki la ioh lad ban rung laitlan bad poi shaduh Umsning.
Ka jingïai kuman jong ka sorkar jylla ban pyrkhing ka pynlong ruh ïa ki district ba marjan bad ka Assam ban jur ki jinglute, ki kam tuh kam thiem, ki kam dih bad khaïi drok bad bun ki runar ba thmu ba pynïap ïa ki mynsiem ba lui lui kumba ngi la sakhi ha kine ki sngi ki taiew ba mynta.
Ka seng KSU kan pyndep la ka sienjam bad ka maham tyngeh ïa ki nongai bylla ba mlien ban wanrah ïa ki nongtrei bar jylla khlem ki kot ki sla ki ba biang namar ki dei ma ki ba pynshlur bad pynkheiñ ïa ka Aiñ Inter-state Migrants Workmen (Regulations of Employment and Conditions of Service) Act 2011 kaba don la ki kyndon ha poh jong ka, bad ïa kitei ki bar jylla la wan shimti noh da ki pulit ka Umsning bad pynthikna ruh ban pynphai biang ïakitei ki bar jylla sha ki shnong ba ki wan.
Halor katei ka jingkynnoh bad jingphla jong ki bar jylla ba ki siew pisa 4 hajar ban lait na khyrdop talasi mynder ha Byrnihat, naka liang ki pulit jong ka Infiltration kila kyntaid mardor, ïa katei ka jingkynnoh kitei ki bar jylla, bad ka dei tang ka jingpynthohbria ïaka tnad Infiltration bad ki pulit kiba ap ha katei ka khyrdop.
Naka liang u Bah S Lyttan u pulit ophisar ba dei peit ïaka tnad Infiltration ha Byrnihat, u la ong ba ka jingioh jong kitei ki bar jylla ban rung sha ka jylla lyngba 2 tylli ki bos ka dei tang ka jingthok jong ki, da kaba ong ba kin leit sha Silchar hynrei kim tip eiei ba kitei ki bar jylla ki don ka jingthmu da kawei pat sha lyndet, wat hadien bala lap ba kim don ïaki kot ki sla ba biang.