Rai ka CoRP ban buddien ïaka ILP, ka ktien khasi haka khyrnit ba 8, u pud u sam bad ban pyrshah ïa ka lynti rel
Nongpoh, Lber 13: Ban dang bteng ban pynkhlaiñ ïaka jingshakri jong ka seng ha Ri-Bhoi District, ka Confederation of Ri-Bhoi People (CoRP) mynta ka sngi kala pynlong da ka jingkynduh lang haka Central Executive Committee ban jied bad pynthymmai biang ïaki nongkitkam jong ka seng hadien ba ka samoi treikam jong ki kala kut noh haka jingïalang kaba la long ha ïing Dorbar ka shnong Iewmawlong.
Ha katei ka jingjied ban pynthymmai biang ïaki nongkitkam, haka jingdonlang ki dkhot naduh ki Unit bad ki Circle bapher bapher kila ibit ban tynrong biang ïaka lyngkor nongïalam sha u Bah Bandari Ryntathiang kum u President, bad 5 ngut ki Vice President ki ban khmih ban peit hala hala ki bynta lane ki Area kiba kynthup ïa u Bah Karbius Lyngdoh, U Bah Fairly Teron u ban khmih ïa ka Eastern Zone, u Bah Phrangkupar Sohtun u ban khmih ïaka Central Zone, U Bah Evanesar Shylla u ban khmih ïa ka Northern Zone bad U Bah Gershom Hat u ban khmih ïa ka Western Zone.
Ïa kyrdan General Secretary la shimti da u Samla Markus Makri, Asst. Secretary Moris Lyngdoh, Finance Secretary Shiningstar Kyntla, Asst. Finance Secretary Ivan Sylliang, Publicity Secratary Roland Lyngdoh lem bad kiwei kiwei bad ïa kitei ki nongïalam bad nongkitkam ka seng la wan ban pynskhem da u Bah Doris Suleiñ u ba dei u nongai buit ba rangbah ka seng.
Haba kren sha ki lad pathai khubor hadien ka jingïalang pynskhem naka liang u Bah Bandari Ryntathiang u ba la shah jied biang sa shisien kum u President u la ai ka jingkhublei ïaki dkhot jong ka seng kiba la shañiah biang sa shisien ban bah ïaka lyngkor kum u nongïalam, bad kular ruh ban ai ka jingshakri kaba khambha naka bynta ka seng bad ka jaitbynriew baroh kawei.
U la ong ruh ba katei ka jingïalang jong ka CEC naka liang ka seng kala shim ïaka rai ban buddien ïa shibuun ki kam ba kynthup ban dawa naka sorkar ba dei ban plie noh ïaka Model Degree College ha Patharkhmah, ba ka sorkar kam dei ban lilam ïaka Block II sha Assam bad kumjuh ruh ka Nongwah Mawtamur, ban dawa naka sorkar ba ka dei ban thungkam mardor da ka lynti kaba khuid ïa baroh ki kam basah, ban buddien ïaka jingpyntreikam ïaka ILP bad ka ktien khasi haka khyrnit ba 8 jong ka riti synshar.
Naka liang ka seng kala shim ruh ïaka sienjam ban pyrshah ïaka lynti rel katba ka sorkar kam pat lah ban pyntreikam ïaka ILP haka jylla.