Nongstoiñ, Naiwieng, 10: Ka jingwan ïuh kjat jong u Conrad Kongal Sangma Myntri Rangbah ka jylla ha Rambrai ha ka sngi balang, ban sieh ïa u maw nongrim jong ka C&RD Block bad ban plie ruh ïa ka ophis treikam jong u Block Development Officer ha ka kamra jong ka ïing u bah Kimfa S.Marbañiang MLA ba mynta, ka la pynkmen bad pynsngewtynnad ïa ki paitbah nongshong shnong bad ruh ïa ki sengbhalang kiba treikam ha ka thaiñ Rambrai.
Nalor kata kaba kham pynkmen shuh shuh ïa ki paitbah ka long ba u Myntri Rangbah u la kren shai kdar ha katei ka sngi ba la dep thung ïa u bah E.Lyngdoh kum u BDO ba pura jong ka Block bad naduh ka shiphew tarik u la sdang ban trei kam noh ha katei ka ophis ba thymmai.
Kumta, mynta ka sngi ki nongïalam ka Federation of Khasi Jaiñtia & Garo People ba la ïalam da u bah Jiedstarland Lyngkhoi President ka FKJGP Rambrai circle, da ka jingkyrmen kaba skhem ki la leit sha katei ka ophis da ka jingthmu ban leit ai khublei ïa u BDO u ba nyngkong tam jong ka Block ba thymmai.
Hynrei, haba ki la poi ha katei ka ophis ym shym la lap satia ïa u BDO bad ka ophis ruh ka dang khang tala. La lap ba don tang uwei u tymmen u ba haba ïakren ruh ym da sngewthuh bha namar ba um da nang bha ïa ka ktien Khasi. Kumta kitei ki nongïalam ka seng kim banse ban wanphai thylli noh na katei ka jaka.
U bah Jiedstarland Lyngkhoi haba ïakren bad u nongthoh khubor hadien ba ki la wanphai na katei ka jaka, u la ong ba ka seng kam shym poi pyrkhat ba u Myntri Rangbah u shu kren kai hynrei lada ki tip ba u shu kren kin ym pynlut kai ïa ka por ban leit sha katei ka ophis. U la ong ruh ba wat la katta ruh na ka liang ka seng ka ai khublei ïa u Myntri Rangbah bad ka sorkar ba ka la lah ban pynurlong ïa ka Block kaba ki paitbah ka thaiñ ryngkat ka jingïatreilang.
Utei u nongïalam ka seng u la ong ruh ba na ka liang ka seng ka kwah eh ba u BDO un don ha ophis man ka sngi, namar ki don haduh shispah khyndai tylli ki shnong ha ka thain kiba don kam ban wad jingïarap na katei ka ophis. U la ong ba lada ka sorkar ka sngewkhia bad ka don ka jingkitkhlieh na ka bynta ki paitbah, ka dei ban pynshai ruh ba la ka la don ne em ka jaka bad shna ïa ka ophis jong ka Block ba pura bad haduh katno ngut ki nongtrei kin don.
U la kyntu ïa ka sorkar lada kam pat don pisa ba thikna ban shna ïa ka Block ophis, kam dei ban shu wan pynbiej kai ïa ki paitbah wat lada dep ban plie ruh.
