444 tylli ki longïing ki 4 tylli ki shnong ka SWKH yn ïoh jingmyntoi na ka skhim umbam ha ka N-NCWSS kaba la mang 8 klur tam

Mawkyrwat, ‘Naiwieng, 10: Ki 444 tylli ki longïing kiba na ki san tylli ki shnong kiba hap ha ka thaiñ Nongjri jong ka Ranikor C&RD Block kin sa ïoh mat ïa ki jingkyrkhu bad jingmyntoi shibun lyngba Jal Jeevan Mission (JJM) ka skhim umbam umdih kaba dei kaba ha ka thup jong ka Nongjri-Nonghyllam Combined Water Supply Schemes (N-NCWSS) ha ka jingmang pisa kaba T. 8,94,87,780/- klur tyngka ba la buh ïa u maw-nongrim mynta ka sngi da u bah Pius Marweiñ, MLA/MDC jong ka Ranikor Constituency uba long kum u kongsan.
Lah ban kdew ba ki san tylli ki shnong kiba la dep ban pruit dak ban pynpoi um lyngba ka Nongjri-Nonghyllam Combined Water Supply Schemes (N-NCWSS) kaba hap ha ka JJM ki long ka shnong Nongjri, Nonghyllam, Rajaju, Poitbli bad Nongumsur kiba dei ki shnong hapoh jong ka South West Khasi Hills District.
U bah Pius Marweiñ, MLA/MDC jong ka Ranikor Constituency haba kren ha ka jingïalang u la ong ba kane ka sngi ka dei ka sngi jong ka jingshah jingkynmaw na ka bynta ki san tylli ki shnong namar mynta ka sngi la buh ïa u maw nongrim kum ka dak jong ka jingkyrmen ïa kaei ba ki paidbah ki la angnud la khamslem ha kaba ïa dei bad ka umbam umdih kaba paka ne na ka skhim jong ka sorkar. Hooid! ki la don kiba la sdang ban pyrshang ban tih ïa la ki jong ki pukri um ha ki jaka la jong la jong hynrei kum ka jingdonkam na ka bynta ka jingbha lang jong baroh ki nongshong shnong kumba na ka liang u Myntri Rangbah jong ka Ri India, u la pynbna ba ka thong ban pynpoi um ha manla la ki thliew ïing ka long shwa u snem 2024 bad kynthup ruh ïa ka Jylla Meghalaya ka jong ngi kumjuh ruh hapoh jong ka South West Khasi Hills ha kaba ha kine ki bnai bad ki snem, shibun ki shnong ki la ïoh ban pynpoi um haduh ki tyngkong ïing jong ki lyngba ka Jal Jeevan Missions Scheme (JJM) bad kane ka dei lyngba ka jingtrei shitom u Myntri Rangbah bad kumjuh ruh u Myntri ka tnad umbam umdih bad ka ophis treikam jong ka tnad umbam umdih ki don ka jingthmu ban leh ïa kata ha ryngkat ka jingtrei shitom ban pynpoi um.
Kumta, kane ka sngi ka long ka sngi ba don jingkyrmen na ka bynta ki 5 tylli ki shnong ha kaba da ka jingangnud jong ki la slem bah, mynta ki la ïohi ïa u maw-nongrim na ka bynta ka skhim umbam ha kaba shen ynsa pyntrei noh khnang ba kan long ka jingkyrkhu ïa ki paidbah. “Ka jingurlong mynta ka sngi ban buh ïa u maw nongrim ka dei lyngba ka jingtrei shitom jong ki paidbah jong ki 5 tylli ki shnong, ki Myntri Shnong, ki ‘riew rangbah, bad kumjuh ruh ki ophisar sorkar”, ong u bah Pius. Namarkata, u la ong ba ym tang ba ngin kut tang ban buh ïa u maw-nongrim ha kane ka jaka hynrei ka jingpyntreikam bad ka jingpynlong kam khnang ba 444 tylli ki longïing kin ïoh jingmyntoi.
Ha kajuh ka por u la kyrpad ruh ïa ki paidbah nongshong shnong ba haba ynsa pyntreikam ïa kane ka skhm ki dei ban long ki briew kiba don ka mynsiem ban sumar ïa ka mei mariang khamtam eh ïa ki tyllong um ba ymdei ban leh jakhlia pathar ïa ki um ki wah hynrei dei ban tyngkai ïa ki khnang ba kan long ka jingmyntoi bad ban ïoh ring ïa ka um kaba khuid ha ki shnong ki thaw kumba la mang. U la buh ruh ka jingkyrpad ba lada nangne shakhmat yn sdang ban pyntreikam, kum ki paidbah nongshong shnong ki dei ban long kiba ai ka jingïatreilang lyngba ka jingai ka kti ka mon ka kti ka diang ha ki bynta baroh khnang ba ka kam kan long kaba ïaid beit ïa ryntih khlem kino kino ki jingpynthut.
Katba ha ka jingkren jong u bah L.G.M. Kharmih, MCS, Sub Divisional Officer (SDO) ka Ranikor Civil Sub Division u la ong ba lada ka jingdon jong ki pipe um ha ki shnong ki thaw ki bun hynrei khlem ka jingïaid jong ka um kam long ka jingmyntoi. Kumta lyngba kane u pynphalang bad pynkynmaw ba lada ki wah duid bad ki wah heh ha ki por ba mynshwa ki ïaid shaid shaid bad ki heh bha ha ka jingdon jong ka um hynrei mynta pat ki la sdang ban ïohi ba ki um ki la sdang rngad bad ki la sdang ban jah suki suki bad ki wah heh ruh ki la nang rit kane ka long ka jingma kaba khraw.
Namarkata, u la kyrpad ryngkat ka jingai jingmut ba ha ki jaka ba shong ki um kum ki nongshong shnong ki dei ban peit da kaba kin sngewbha ban pyllait na ka kam dewbilat, bad ha ki jaka ba shong bha ka um kum ki nongïalam shnong ki dei ban pynmih ki kyndon shnong ban mana bad khang ban pom ïa ki dieng, ki siej hynrei pynmih pat da ka hukum ba ki paidbah ki dei ban thung kham bun ki dieng, ki siej hajan ki wah khnang ba ka um kan neh bad ba yn ïoh ban pynpoi um ha ki pipe um lyngba ki tyllong ba la mang ban ring um.
“Ai ba ka jingim ryngkat bad ka um kan neh ym tang ha ki ha kane ka pateng ba mynta hynrei kan neh ha ka mariang lyngba ki dieng ki siej bad ba ka pateng ka ban sa wan ruh kan ïoh kyrhai ka umbam umdih kaba biang”, ong u bah bah L.G.M. Kharmih.
Ha kane ka sngi la pynïaid ïa ka jingïalang da u bah S. Najair, Executive Engineer ka PHE Mawkyrwat bad bud sa ka jingkren ïa ka phang jong kane ka sngi. La ïoh ruh ka jingkren lyngkot na u u bah B.B. Shylla, Secretary ka Shnong Nongjri bad na u bah Listen Marweiñ kiba dkhot jong ka Nongjri-Nonghyllam Combined Water Supply Schemes, u bah L.G.M. Kharmih, SDO ka Ranikor Civil Sub Division.