Khang tala ki sengbhalang bad ki seng nongñiah kali kamai ïa ka Kyrdop Lum Khajna ha ïalong-Pasyih
Pyllait noh ka jinglum khajna ïa ki kali ML-04 bad ML-11
Jowai, Jymmang 15: Mynta ka sngi Thohdieng ki paidbah ha ryngkat ki dkhot ka Jaiñtia National Council (JNC) Western Zone, ka Pnar Students’ Movement (PSM), ka Hynñiewtrep Youth Council (HYC), ki seng jong ki nongñiah kali kamai bad ki riew shimet kila leit ban khang tala syndon ïaka Toll Gate jong ka National Highways Authority of India (NHAI) kaba don ha Ialong-Pasyih West Jaiñtia Hills District.
Hashwa ba kin leit sha katei ka jaka Toll Gate la don ka jingïalang ba lyngkot ha Pasyih ha kaba kila ïakren ba ka jingthmu jong ki ka long ban dawa pyllait noh ban lum khajna ïa ki kali ML 04 bad ML 11 kumba ju long ha ki por bala dep, na ka liang u MDC ka Saphai-Sahsniang ma Rikut Parein ula wan ban ai mynsiem bad kitbok ba ka jingthmu jong ki kan long kaba jop.
Hadien bala pynsangeh ïa ka jinglum khajna ha Toll Gate, na ka liang ki tei ki nongïalam kila ap shipor ïa ki bor ba halor jong ka NHAI bad ki bor sorkar ban wan ïakren hynrei ym shem la don ba wan ïakren bad ki, kumta kila leit noh sha ka ophis treikam jong ka Toll Gate kaba don hajan ban phah pynmih noh ïa baroh ki nongtrei napoh ka ophis bad phah khang syndon ïa katei ka ophis.
Ka jingdawa ba hakhmat eh jong kitei ki nongïalam seng bad ki nongñiah kali kamai ka long ban nym lum khajna shuh na ki kali ML-04 bad ML-11 haba ïaid lyngba katei ka Toll Gate, kaba ar kila dawa na ki bor jong ka NHAI ban kin weng noh mardor ïa ka ejahar pyrshah ïa ki nongïalam ka JNC Western Zone.
Kum ban shu pynkynmaw na ka liang u Deputy Commissioner ka West Jaiñtia Hills haka 17 tarik u Lber ula pynmih ïa ka hukum ban lum khajna ïa baroh ki kali lait noh tang ïaki kali kiba naka Shnong Ialong, Pasyih, Phramer, Sabah Muswang, Muthlong, Mookaswan, Nangbah bad Mihmyntdu.