Ladep pynkhreh ka jylla ïa ka SIR jong ka Thup Kyrteng

Shillong, Jymmang 15 : U Chief Electoral Officer (CEO) ka Jylla Dr BDR Tiwari ha ka sngi Thohdieng, ula ïathuh ba ka Jylla ka la dep pynkhreh pura ban pynlong ïa ka Special Intensive Revision (SIR) jong ka Electoral Roll hapoh ka jylla ha ka wat kaba lai, kaba la pynbna da ka Election Commission ka India (ECI).
“Ka Meghalaya ka la long kaba pynkhreh ban leh ïa ka SIR ha ka Jylla kat kum ka por bala buh da ka ECI” ong u Dr Tiwari hadien ba dep pynïaid ïa ka jingïalang bad baroh ki seng saiñ pyrthei, da kaba Booth Level Agent (BLA) athuh ruh ba u la kyntu ruh ïa ki Seng Saiñ Pyrthei ba kin thung noh ïa ki Booth Level Agent (BLA) .
“Ka Election Commission of India kala pynbna ïa ka wat kaba lai jong ka Special Intensive Revision (SIR) na ka bynta ki Jylla bad ki UT ba dang sah jong ka Ri bad kumta, ka Meghalaya ruh ka la hap lang ha kane ka wat jong ka SIR” ula ong.
ïa ka tarik ba dei hok na ka bynta ka revision la buh ban long ha ka 1 tarik Risaw, 2026 na ka bynta ka Meghalaya, Karnataka, Maharashtra, Jharkhand bad Delhi.
Haba batai ïa ka por, u Dr Tiwari ula ong ba ki jingpynkhreh na ka bynta ka jingai jinghikai bad ka jingshon kan long naduh ka 20 haduh 29 tarik Jylliew, ban yn pynbud da ka jingleit rung na kawei ka thliew ïing sha kawei pat da ki Booth Level Officers naduh ka 30 tarik Jylliew haduh ka 29 tarik Naitung. Ka jingpynbeit ryntih ïa ki Polling Station yn pyndep lang hapoh ka 29 tarik Naitung.
“ïa ka draft electoral roll yn sa pynmih ha ka 5 tarik Nailar. Ka por ban phah ïa ki jingkam bad jingpyrshah kan ïaid naduh ka 5 tarik Nailar haduh ka 4 tarik Nailur, katba ïa ka jingphah notice bad ka jingpynbeit ïa ki jingkam kan bteng haduh ka 3 tarik u Risaw. ïa ka electoral roll ba khatduh yn sa pynmih ha ka 7 tarik Risaw” ula ong.
U Dr Tiwari u ïathuh ba ki seng saiñ pyrthei ki la ïoh ïa ka jingbatai kaba bniah halor kine ki kam ba hap ban leh.
“Ngi la ïoh ïa ka jingïakren ba nyngkong bad ka jingïalang bad baroh ki seng saiñ pyrthei ka Jylla. ïa ka por bad ki kam ba donkam ban leh ha ka SIR la dep ban batai lut bad ïa baroh ki jingkylli bad ki jingsngewkhia bala pynsngew da ki seng saiñ pyrthei ruh lah dep ban pynbeit” ula ong.
U CEO ula pan ïa ka jingïatreilang ki seng saiñ pyrthei ha ka ban thung ïa ki Booth Level Agents.
“Ngi la kyrpad ïa ki ban thung ïa ki Booth Level Agent (BLA) na ka liang jong ki. Ngi khmih lynti ïa ka jubab kaba bha na ki seng saiñ pyrthei namar ki BLA ruh ki long ki kynhun ba kongsan bha ha ki shnong ki thaw ba kin trei ha ki Polling Station ha ryngkat bad ki BLO ban wanrah ïa ka jingtreikam kaba shai” ula ong.
“Ngi la kut jingmut pura ban pynlong ïa kane ka SIR kaba shai, kaba laitluid, ka bym shah liang bad ban pynlong ïa ka electoral roll kaba koit ba khiah bad ka bym don jingbakla” ong u Dr Tiwari.
Halor ki kot ki sla, ula kdew ïa saw jait ki nongthep vote. “Ha ka por lum kyrteng, ka jinglum thup ïa ki ïing, yn donkam ïa ki kot ki sla badi ki don saw jait na ki nongthep vote-kito ki kyrteng kiba la register ha ka voter list u snem 2005, kine ki nongthep vote kin hap ban aiti tang ïa ki bynta kiba donkam jong utei u snem jong ka voter list ha ryngkat ka phorm pynrung kyrteng” ula ong.
“Kawei pat ka long ba kito ki kyrteng kiba shem ha ka voter list 2005 bad kiba la kha ha India hashuwa ka 1 tarik Naitung, 1987, kine ki nongthep vote kin hap ban upload ban aiti ïa ki kot ki sla jong ki hi ha ryngkat bad ka phom pynrung kyrteng. Ki don 11 tylli ki kot ki sla, ïa kiba ka thup jong ki la ai da ka ECI” ula bynrap.
“ïa kito kiba kha hapdeng ka 1 tarik Naitung 1987 bad 2 tarik Nohprah, 2004 “kiba ki kyrteng ka Kmie bad u Kpa kim pat shym la pynrung ha ka voter list, kine ki nongthep vote kin hap upload ïa katto katne ki kot ki sla jong ki hi lem bad ki kot ki sla jong ki Kmie ne Kpa ha ryngkat bad ka phom pynrung kyrteng”.
Kiba saw ki kynthup ïa ki nongthep vote “kiba la kha hadien u Nohprah 2004 bad kiba ki kyrteng ka Kmie bad Kpa kim pat rung ha ka voter list jong utei u snem, kine ki nongthep vote ki hap ban upload bad aiti ïa ki kot ki sla jong ki hi, ki kot ki sla ka Kmie, ki kot ki sla u Kpa ha rngkat bad ka phom pynrung kyrteng” ong u Dr Tiwari.