Mawkyrwat, ‘Naiwieng, 10: U Superintendent of Police (SP), South West Khasi Hills District u la pynbna paidbah lada lap ba don ki kali kiba ïaid bad kiba la pynkylla ne bujli ïa ki tiar ki tar beaiñ na kaei kaba la don lypa bad kaba lah ban poi sha u pud ban shah daiñ kuna bad shah pynshitom kat kum ka Motor Vehicles Act (Amendment) 2019, Motor Rules Act 1989 bad ka hukum jong ka Iingbishar ba ha khlieh jong ka Ri India.
Katkum ka jingpynmih hukum la mana ban buh bujli ïa ki pipes pynmih-tdem (performance silencer/loud silencer), ki lait ki bym ïoh jingbit ban teh kum ki lights bad lights-bars, ki lait saw lane or lait jngum/ki lait kiba khih ne blinker kiba ïasyriem bad ki kali jong ki VIP, ban buh ïa ki air-horns, tah ki ïit ïong, ki ‘custom plate number’ bad kiwei de ki jait tiar ki bym ïa hap katkum ka Regional Transport Office (RTO).
Ka jingpyndait ne tah ïa ki tiar ki bym long katkum ka jingbthah bad ka jingñiah thur-mur ïa ki kali khlem u seatbelts bad khlem ki jing-da-khlieh ne helmets ka lah ban wanrah ka jingbym ryntih bad ka bym ïa hap katkum ki aiñ.
Ka ophis u SP ka la ai jingmut ïa ki trai kali bad ki nongñiah kali ban weng shi syndon ïa kiba kum kitei ki tiar na ki kali jong ki hapoh ka 15 sngi naduh ba pynmih ïa kane ka jingpynbna hynrei lym kumta ka Traffic Branch ryngkat ki Officer In-charge’s ne ki In-charge’s na kiwei kiwei de ki station kin daiñ kuna ïa ki trai bad ia ki nongñiah kali ki bym bud ïa ki jingbthah.
