Phah wad kyrtong ka UDP bym treh shuh u Bah Eugene

0

Shillong, Naiwieng 03 : Ka United Democratic Party (UDP) mynta ka la khih khohreh ban wad noh da uwei pat u kyrtong ban aireng ha kane ka elekshon MLA na Mawphlang Constituency kaban long ha u 2023 hadien ba u MLA ba mynta, Bah Eugene Lyngdoh u la kyntait ban ïakhun biang.
“Baroh shi katta ka Mawphlang kam don ïa ki nongkitkam kiba pura jong ka party, na kata ka daw hynne ka sngi ngi la jied ïa ki nongkitkam kiba pura ba kin thaw pat ïa ka Election Committee bad khot pat ïa ki kyrtong kiba kwah ban ïakhun elekshon na ka party na Mawphlang,” ong u President ka UDP East Khasi Hills, Bah Titos W Chyne haba kren bad ki lad pathai khubor.
U Bah Titos u la ïathuh ruh ba ha ka jingïalang na ka liang u Bah Eugene u la kren da kaba shai ba un ym lah shuh ban ïakhun biang ïa katei ka elekshon ha u 2023 da kaba ong ba dei na ki daw shimet.
“U ong ba kadei ka daw shimet bad kumta un ym lah shuh ban ïaleh elekshon. Hynrei u la ong pat ba un ïai don beit bad ka party, kumta ngi la bynshet ha u hi kum u President jong ka Mawphlang Circle jong ka UDP,” bynrap biang u Bah Titos.
Dang shen la mih ki khubor ba ka UDP Mawphlang ka kwah ba u kyrtong ka PDF Bah Auspicious Lyngdoh ba un aireng na ka tiket jong ka party. Hynrei tang hadien katto katne sngi u Bah Auspicious u la pynbna ba un ïakhun beit ïa ka elekshon MLA na ka PDF bad kyntait ïa ka jingtyrwa jong ka UDP.

Leave A Reply

Your email address will not be published.