Shillong, Naiwieng 3 : U MLA ka Mawlai u bah P.T Sawkmie u la sngew bitar tyngeh ïaki kontraktor ki bym shim khia ban pyndep kloi ïa ka jingpyntrei ïa ki surok hapoh ka Mawlai Constituency namar ka la buh ïa ki paidbah ha ka jingeh bad jingsyier kaba khraw ha ka ïaid ka ïeng. ïa kane ula pynpaw mynta ka sngi ha kaba leit jurip biang ïa kitei ki surok kiba la sniew bad sah khongreng namar ka jingbym shim khia ki kontraktor.
U bah Sawkmie haba kren hadien ba la leit jurip u la ong ba u kyntu biang ïa ka sorkar ban shim khia ban phah pyndep kloi ïa kine ki surok naduh Lad Petrol Pump ter ter shaduh FCI bad kumjuh ruh na ka Lad Mawroh ban mih shaduh Mawtawar namar kine ki surok ki la sniew bad buh ïaki paidbah ha ka jingma ïoh sied ki maw haba ïaid ki kali ruh bad nalor kata kaba la ktah ia ka koit ka khiah ki paidbah na u pum pum.
U la ïathuh na ka liang jong u kum u nongmih khmat na ka por sha ka por la kren bad la pynsngew ha kaba ïadei bad kane ka jingsniew jong kine ki surok sha ka sorkar khamtam halor ka jingleh palat ki kontraktor ba kim shim khia ban pyntrei kam kloi ba pyndep ïa ka jingtrei. Ki paidbah ki la ud, baroh ki paidbah ki la ud ia ka surok bad kum u nongmihkhmat jongku u don ka jingsngew bad ka jingktah halor kane ka jingud ki paidbah.
“Kaba nga sngewkhia ka long ba kine ki kontraktor ba shim ban trei ïa kine ki kam na ka liang jongki kim shim khia ban pyndep. Nga kyntu ïa ki ba haba ki la shim ïa ka kam ban pyntrei kloi ne lada kim lah shuh ban pyntrei ruh kin pynpaw sha ka sorkar ba kim lah shuh ban pyndep. Sa kawei pat nga kyntu ïa ki bor ba dei peit jongka tnad PWD ïa kane ka surok ba lada kine ki kontraktor kim lah ki dei ban pynduh noh ïa kane ka kam. Na ka liang ki engineer, ki SDO ki la bthah ïa ki kontraktor ban sdang noh ïa ka kam hynrei ki shu kular ban sdang noh tang ka ktien ka kam kim sdang shuh. Kane ka pynpaw ba kine ki kontraktor kim salia namar ki don ki briew ki ban ïada ïa ki na shalor” ong u bah Sawkmie.
