Shillong Jylliew 26: U Symbud Myntri Rangbah ka jylla ba khmih ïa ka kam pohïing u Bah Prestone Tynsong ula pyntip ba ka sorkar jylla ka la phah tohkit ïa ka jingjia hynnin ka miet Sngi U Blei ha Umsyiem halor ka huri hura hapdeng ki shipai BSF bad ki riew paidbah, kaba poi sha u pud ba ki BSF ki hap siat da ki ktang suloi sha suiñ ban pyntieng ïa u paidbah.
Haba ïakren bad ki nongthoh khubor u Bah Prestone ula ong, ba yn phah tohkit bniah ha ka kynhun tohkit halor ka jingjia ha Umsyiem halor ka jinghuri hura kaba la mih hapdeng ki BSF bad ki paidbah.
Ula ïathuh, ba ki la don 4 ngut kiba mynsaw ha kane ka jinghuri hura kaba kynthup 2 ngut ïa ki riew paidbah bad 2 ngut ki shipai BSF ha kaba la ïalam ïa ki ban ïoh jingsumar ha Dawki PHC bad hadien kane ki la ïoh ban leit phai noh sha la ïing.
“ïa mynta nga dang ap ïa ka kaiphod kaba pura hynrei na kaei kaba nga sngewthuh ka long ba ki BSF ki la bat ïa ar tylli ki kali kiba kit ïa ki jaiñ bad la ïalam ïa ki shapoh ka ktem jong ki BSF, hynrei u nongniah bad u nongbud jong kine ki kali ki la ïoh ban phet krad noh. Hadien katto katne por, kawei ka kali riew paidbah kala leit sha ka ktem ki BSF bad haba ki BSF ki la mih ban ïakren ka la mih ka jingïania hapdeng kine ki arliang mamla” ong u Bah Prestone.
U Bah Prestone ula ïathuh ba ula dep bthah ïa ki heh pulit ka District ban peitngor halor katei ka jingjia bad mynta ki pulit ki dang ap ïa ka ejahar ka ban ujor da ki paidbah ne ki BSF.
U Myntri Kam Pohïing ula ong ba ïa mynta ym pat lah ban ong eiei ne ban pynthikna ïa kane ka jingkam jong ki BSF hynrei shen yn lum ïa ka jingïalang bad u IG ka BSF ba nangne shakhmat kadei ban don ka jingïatreilang hapdeng ki pulit bad ki BSF haba ki pynlong ïa kano kano ka jingkhynra.
