Tura, Naitung, 24: Uwei u Youtuber u la thep ïa kawei ka Video ha kaba la kam ba katba u dang sah ha Tura u la mad ïa ka jingshah pyndik ha ka jingïaid lynti kaba um pat mad mynno mynno ruh.
Ha kaba ïadei bad kane, la ïathuh ba kane ka la jia ha u bnai Jymmang, 2022 ha kaba uwei u nongbuaid u la kren bym dei ïa une u Youtuber uba wan nabar ka jylla.
Tang shu ïoh jingtip halor kane, marmar ki Pulit ki la leit sha ka jaka ba la jia ka jingïakajia bad kem noh ïa u nongbuaid uba pyrshang ban thaw jingkulmar.
Hadien kane, une u Youtuber u bym kwah ujor eiei hynrei ula shu kyrpad ïa ki Pulit ban shu ïasuk noh. Ki Pulit ruh ki la pyllait noh ïa une uba thaw jingkulmar bad shu maham ba um dei shuh ban dang mlien nangne shakhmat.
Hynrei kyndit kynsan, une u Youtuber u la pyllait ha ka Social Media ïa ka Video ba u la ringdur ha ka por ba la u shah kynroi ha utei u nongbuaid.
“Ngi kyrpad ïa ki nongshong shnong ba kin long kiba jai jai. Ïa kaba donkam ngi ladep leh. Sngewbha ban pynneh ïa ka shongsuk shongsaiñ bad ym ban shim ïa ka aiñ ha ki kti,”la kyrpad ki Pulit jong ka West Garo Hills.
Na ka liang jong ka A·chik Holistic Awakening Movement (AHAM) Central Executive Board ka la pynrem jur halor ka jingshah ktah kti jong u Youtuber ka Youtube Channel #Thetalltrotter.
Ka AHAM ka la kyntu ïa ki bor Pulit ba kin shimkhia ban tohkit bniah halor kane ka jingjia namarba ka ktah ïa ka jingitynnat bad ïa ka kolshor jong ka jaidbynriew Garo bad ïa ka jingsbun mynsiem jong ki paid Garo haba ki pdiang ïa ki briew kiba nabar kiba wan jngohkai sha rilum Garo.
U Kyrwoh ba la phah da u President ka seng u Georgeprince Ch. Momin, u la kyntu ïa ki Pulit ban kem mardor bad ban pynshitom ïa uba donkti ban ktah kti ïa u Youtuber hapoh ki kyndon jong ka aiñ.
“Lada ki nongwan jngohkai pyrthei ki shah leh ha kane ka rukom, ki kam jngohkai pyrthei jong ngi kin shah pynhiar dor, namarkata ka Seng ka kyntu ïa ki bor jong ka aiñ ban pynshitom pyrshah ïa uba donkti,” ong u kyrwoh.
Ka AHAM ka la dawa ïa uba donkti ba u dei ban panmap paidbah ïa u Youtuber halor ka jingleh bym dei pyrshah ïa u ku u nongwan jngohkai pyrthei. “Une uba la shah kynnoh um don hok ban pynjaboh ïa ka dur jong ka Tura Garo Hills bad ïa ki paidbah A·chik,” ong ka seng.
Ka Seng ka la byrngem lada une uba la shah kynnoh u pynslem ban panmap ka seng kam banse ban ujor pyrshah ïa u bad ha kajuh ka por ka seng ka la kyrpad ïa u Youtuber ban mudui da ka ejahar pyrshah ïa uba la ktah kti ïa u.
Ka AHAM ka la kyrpad ïa u Youtuber ban weng noh ïa ka video kaba pynhiardor ïa ka dur jong ka rilum Garo bad ïa ki paid Achik namarba ka Seng ka la ieng ryngkat bad u ban pyn ïoh ïa ka hok.
