Phah khang syndon ka RBYF 2 tylli ki Dhaba ha Pahamrioh, ba shah ktah ki paidbah na jingsma iwtung
Wat ailad ban plie katba ym pat lah ban pynbha ïaki nala bad pynjah ïaka sma iwtung
Nongpoh, Ïaiong 03: Hadien ka jingud bad ka jingujor jong ki paidbah ka shnong Pahamrioh kiba shong ba sah marjan bad 2 tylli ki Dhaba ba kynthup ïaka Highway Dhaba bad Sirdarji Dhaba, ki nongïalam jong ka RBYF Nongpoh Circle mynta ka sngi kila leit ban phah khang khyrdep syndon ïa kitei ki dhaba namar ka jingsma iwtung kaba shyrkhei kaba la mih ha katei ka jaka kaba la ktah shikatdei ïaka koit ka khiah ki paidbah.
Kum ban shu pynpaw ba naka liang ki paidbah kila ujor ruh sha ki bor district ban tuklar ïaka jingleh khlem akor jong kitei ki dhaba, ha kaba wat u majistor u la leit ban jurip ïa katei ka jaka ban lap ïaka jinglong jingman kumba la ud da ki paidbah, hynrei haduh mynta ki paidbah ki hap ban ring mynsiem ïaka lyer iwtung kaba mih na kitei ki dhaba ba pyntuid khlemakor khlem ki nala kiba biang.
Haba kren sha ki lad pathai khubor hadien ka jingleit jurip bad phah khang ïa kitei ki dhaba, naka liang u Samla Aristone Ryndongsngi President ka RBYF Nongpoh Circle u la ong ba kum ka seng ka dap da ka jingsngewkhia hadien ka jingwan ud jong ki nongshong shnong, bad dei halor katei ka nongrim ba naka liang ka seng kala leit ban pynlong ka jingjurip ha kaba la lap ba ka jingsma iwtung kaba mih na katei ka jaka ka long kaba shyrkhei kaba ki paidbah wat ban bam ban dih ruh kim sngew nang shuh.
U la ong ruh dei namar ka jingkyrpad jong ki paidbah ban khang shuwa katba kitei ki dhaba kim pat lah ban pynbha ïaki nala bad pynjah ïaka jingsma iwtung ba kum ka seng kala shim ïaka sienjam ban phah khang khyrdep syndon ïa kitei ki dhaba ha katei ka sngi bad ka shong ha ki paidbah pat ban shim ïaka rai lano ba kitei ki dhaba ki lah ban plie biang.
“Ngi dap da ka jingsngewkhia ba ki bar jylla kiba shu wan bylla kila sdang ban pyni bor ha katei ka jaka ha kaba kim sngap shuh ïaka eh ka shon bad ka jingkyrpad jong ki paidbah, ha kaba katei ka nala kala dap da ki kaiñ iong kiba isaitmet wat ban peit” la ong u Bah Aristone da kaba bynrap ruh kitei ki dhaba kim don jingkitkhlieh eiei ban peit ïaka jingktah ka koit ka khiah jong ki paidbah.